82 سالہ منموہن سنگھ نے کورونا کو دی شکست، اسپتال سے جلد ہوگی چھٹی

ڈاکٹروں کا کہنا ہے کہ منموہن سنگھ اب بالکل ٹھیک ہیں اور جلد انھیں اسپتال سے چھٹی دے دی جائے گی۔ علاج کے بعد منموہن سنگھ کی کچھ تصویریں میڈیا میں آئی ہیں جس میں وہ خوشی کا اظہار کر رہے ہیں۔

تصویر سوشل میڈیا
تصویر سوشل میڈیا
user

قومی آوازبیورو

دہلی میں کورونا انفیکشن تیزی کے ساتھ بڑھ ضرور رہا ہے لیکن اچھی بات یہ ہے کہ اس وائرس کی وجہ سے مہلوکین کی تعداد 7 سے آگے نہیں بڑھ رہی ہے۔ کچھ مریض ٹھیک ہو کر گھر بھی پہنچ گئے ہیں اور کوارنٹائن میں ہیں۔ اس درمیان ایک خوشخبری یہ سامنے آئی ہے کہ 82 سالہ منموہن سنگھ نامی کورونا پازیٹو مریض نے اس وائرس کو پٹخنی دیتے ہوئے زندگی اور موت کی جنگ میں موت کو شکست دے دی ہے۔

خبر لوک نائک جے پرکاش نارائن اسپیٹل یعنی ایل این جے پی اسپتال سے آئی ہے جہاں بزرگ منموہن سنگھ کا ڈاکٹروں نے کامیابی کے ساتھ علاج کیا اور کورونا پازیٹو بزرگ حضرات کو بھی یہ پیغام دے دیا کہ کسی کو مایوس ہونے کی ضرورت نہیں ہے۔ ابھی تک یہی کہا جا رہا تھا کہ بزرگ اور کمزور قوت مدافعت والے انسان کورونا کے شکار زیادہ ہو رہے ہیں اور انھیں اپنی زندگی سے ہاتھ دھونے کا خطرہ زیادہ ہوتا ہے۔


بہر حال، ڈاکٹروں کا کہنا ہے کہ منموہن سنگھ اب بالکل ٹھیک ہیں اور جلد انھیں اسپتال سے چھٹی دے دی جائے گی۔ علاج کے بعد منموہن سنگھ کی کچھ تصویریں میڈیا میں آئی ہیں جس میں ان کا جسم پوری طرح سے ایپرن (مریضوں کا کپڑا) سے ڈھکا ہوا ہے۔ وہیل چیئر پر بیٹھے منموہن سنگھ ہاتھ جوڑ کر ڈاکٹروں کا شکریہ ادا کیا۔ ایک تصویر میں کچھ ڈاکٹرس ان کے ساتھ کھڑے ہو کر تصویر کھنچواتے ہوئے بھی نظر آ رہے ہیں اور اس میں منموہن سنگھ نے وکٹری کا نشان دکھا کر کامیاب علاج کی خوشی کا اظہار کیا ہے۔


واضح رہے کہ منموہن سنگھ کئی دنوں سے اس اسپتال میں داخل تھے اور اپنا علاج کرا رہے تھے۔ ڈاکٹروں کی ٹیم لگاتار ان کی نگرانی کر رہی تھی بالآخر انھیں کامیابی حاصل ہوئی۔ اسپتال انتظامیہ نے اس بات کی جانکاری دی ہے کہ منموہن سنگھ نے کورونا وائرس انفیکشن کو ہرا دیا ہے اور زندگی کی اس جنگ میں فتح حاصل کر لی ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔