ایمیزون، فلپ کارٹ، میشو اور میٹا پر غیر قانونی واکی ٹاکی فروخت کرنے پر جرمانہ

مرکزی صارف تحفظ اتھارٹی نے صارف تحفظ قانون 2019 اور دورسنجار قوانین کی خلاف ورزی کے معاملے میں بڑی کارروائی کرتے ہوئے متعدد ای کامرس پلیٹ فارموں پر بھاری جرمانہ عائد کیا ہے۔ یہ کارروائی ان پلیٹ فارموں پر غیر مجاز واکی ٹاکی اور پرسنل موبائل ریڈیو آلات کی فہرست سازی اور فروخت کے خلاف از خود نوٹس لیتے ہوئے کی گئی۔ اتھارٹی نے آٹھ اداروں کے خلاف حتمی احکامات جاری کرتے ہوئے مجموعی طور پر 44 لاکھ روپے کا جرمانہ لگایا ہے، جس میں بڑے پلیٹ فارم بھی شامل ہیں۔

تحقیقات کے دوران یہ بات سامنے آئی کہ مختلف آن لائن مارکیٹ پلیسز پر 16 ہزار 970 سے زائد ایسے مصنوعات درج تھیں جو موجودہ ضابطوں پر پورا نہیں اترتیں۔ ان مصنوعات میں زیادہ تر وہ واکی ٹاکی شامل تھیں جو لائسنس سے مستثنیٰ فریکوئنسی بینڈ سے باہر کام کرتی تھیں۔ اس بنیاد پر 13 ای کامرس پلیٹ فارموں کو نوٹس جاری کیے گئے، جن میں میشو، میٹا پلیٹ فارمز، فلپ کارٹ اور ایمیزون جیسے معروف نام بھی شامل تھے۔

اتھارٹی نے پایا کہ یہ پلیٹ فارم ایسے پرسنل موبائل ریڈیو کی فروخت کو سہولت فراہم کر رہے تھے جو نہ تو لائسنس سے مستثنیٰ فریکوئنسی بینڈ میں آتے تھے اور نہ ہی ان کے لیے لازمی آلاتی قسم کی منظوری یا اجازت نامے کی مناسب تفصیل فراہم کی گئی تھی۔ قواعد کے مطابق صرف 446.0 سے 446.2 میگا ہرٹز فریکوئنسی بینڈ میں استعمال ہونے والے پی ایم آر آلات کو لائسنس سے چھوٹ حاصل ہے، اس کے علاوہ تمام آلات کے لیے اجازت اور تصدیق لازمی ہے۔

صارف امور کی سکریٹری ندھی کھرے نے وضاحت کی کہ صارفین کے حقوق کی خلاف ورزی، گمراہ کن اشتہارات اور غیر منصفانہ تجارتی طریقوں کے تحت میشو، میٹا پلیٹ فارمز، فلپ کارٹ اور ایمیزون پر دس دس لاکھ روپے کا جرمانہ عائد کیا گیا ہے، جبکہ دیگر چند پلیٹ فارموں پر ایک ایک لاکھ روپے کا جرمانہ لگایا گیا۔ انہوں نے بتایا کہ کچھ اداروں نے جرمانے کی رقم ادا کر دی ہے، تاہم چند پلیٹ فارموں کی جانب سے ادائیگی ابھی باقی ہے۔

اتھارٹی نے واضح کیا ہے کہ مستقبل میں اس طرح کی خلاف ورزیوں پر سخت کارروائی جاری رہے گی اور ای کامرس پلیٹ فارموں کو اس بات کا پابند بنایا جائے گا کہ وہ کسی بھی ریڈیو فریکوئنسی آلات کی فروخت سے قبل تمام قانونی تقاضوں کی مکمل پابندی کریں۔