جنوبی کشمیر میں 29 غیر مقامی ملی ٹنٹ سرگرم: آئی جی پولیس کشمیر

سری نگر: کشمیر زون پولیس کے انسپکٹر جنرل وجے کمار نے کہا ہے کہ جنوبی کشمیر میں 29 غیر مقامی ملی ٹنٹ موجود ہیں۔ انہوں نے کہا کہ جنوبی کشمیر کے ترال میں حزب الماہدین سے وابستہ ملی ٹنٹوں کا صفایا کیا گیا ہے جو سیکورٹی فورسز کے لئے ایک بہت بڑی کامیابی ہے۔ موصوف آئی جی پی نے ان باتوں کا اظہار ہفتہ کے روز یہاں ہمہامہ میں واقع سی آر پی ایف کے ریکروٹ ٹریننگ سینٹر میں جمعے کو جنوبی ضلع اننت ناگ کے بجبہاڑہ میں ہلاک ہونے والے سی آر پی ایف ہلکار کی میت پر پھول مالائیں چڑھانے کی تقریب کے حاشئے پر میڈیا کے ساتھ بات کرتے ہوئے کیا۔

انہوں نے کہا کہ 'جنوبی کشمیر میں ابھی بھی ملی ٹنٹوں کی تعداد زیادہ ہے۔ وہاں 29 غیر مقامی ملی ٹنٹ موجود ہیں، یہ غیر مقامی ملی ٹنٹ مقامی ملی ٹنٹوں سے زیادہ تربیت یافتہ ہوتے ہیں'۔ انہوں نے کہا کہ غیر مقامی ملی ٹنٹ جنوبی کشمیر کے میدانی علاقوں کی بجائے بالائی علاقوں جیسے کوکر ناگ، کھریو وغیرہ میں موجود ہیں جوںہی نیچے آئیں گے انہیں مارا جائے گا۔

وجے کمار نے کہا کہ ترال میں حزب المجاہدین سے وابستہ ملی ٹنٹوں کا صفایا کیا گیا ہے جو سیکورٹی فورسز کے لئے ایک بہت بڑی کامیابی ہے۔ ان کا کہنا تھا کہ 'ترال، سوپور، شوپیاں سال 1989 سے ہی ملی ٹنسی کے گڑھ رہے ہیں، ہم نے ترال میں حزب المجاہدین کے ملی ٹنٹوں کا صفایا کیا ہے جو سیکورٹی فورسز کے لئے بہت بڑی کامیابی ہے'۔ موصوف آئی جی پی نے کہا کہ ایسا نہیں ہے کہ صرف حزب سے وابستہ ملی ٹنٹوں پر فوکس ہے بلکہ یہ خفیہ اطلاعات پر منحصر ہے جن کی اطلاع ملتی ہے ان کے خلاف آپریشن کیا جاتا ہے۔

جنوبی کشمیر کے بجبہاڑہ میں فائرنگ کے واقعے میں مارے جانے والے ایک سی آر پی ایف اہلکار اور ایک چھ سالہ بچے کی ہلاکت کے بارے میں پوچھے گئے ایک سوال کے جواب میں انہوں نے کہا کہ 'ہمارے کچھ لوگوں اور عینی شاہدین نے زاہد داس نامی ملی ٹنٹ کو پہچان لیا ہے جس نے بائیک پر آکر فائرنگ کی جس میں ہمارا ایک جوان شہید ہوا اور ایک چھوٹا بچہ بھی ہلاک ہو گیا'۔