بہار میں ایک دن میں 12 مریض کورونا پازیٹو، متاثرین کی تعداد 51 ہوئی

پٹنہ: بہار میں محض ایک دن میں 12 مریضوں کے کورونا وائرس سے متاثر ہونے کی تصدیق کے بعد ریاست میں پازیٹو مریضوں کی تعداد بڑھ کر 51 ہو گئی ہے۔ سرکاری ذرائع نے یہاں بتایا کہ آج آئی جانچ رپورٹ میں سیوان ضلع کے رگھو ناتھ پور بلاک کے 10 اور بیگو سرائے ضلع کے دو مریضوں کو کورونا وائرس سے متاثر پایا گیا ہے۔

سیوان کے سبھی متاثرین رگھوناتھ پور بلاک کے پنجوار باشندہ اس نوجوان کے کنبہ کے اراکین بتائے جا رہے ہیں جس کے کورونا پازیٹو ہونے کی تصدیق 03 اپریل کو ہوئی تھی۔ وہ 21 مارچ کو خلیجی ملک عمان سے ہندوستان آیا تھا۔

ذرائع نے بتایا کہ پنجوار کے دس متاثرین میں دو بچیاں سمیت آٹھ خواتین، ایک نوعمر اور ایک نوجوان شامل ہیں۔ وہیں بیگو سرائے میں ملے متاثرین میں ایک نوعمر اور ایک نوجوان ہے۔ صحت محکمہ ان دونوں کی تفصیلات معلوم کر رہا ہے۔ اس طرح بہار میں متاثرین کی تعداد بڑھ کر 51 ہوگئی ہے۔

غورطلب ہے کہ بہار میں سیوان کورونا پازیٹو مریضوں کا ہاٹ اسپاٹ بن گیا ہے۔ اس ضلع میں متاثر مریضوں کی تعداد 20 ہوگئی ہے، جن میں چار صحت یاب ہوگئے ہیں۔ مونگیر کے سات پازیٹو مریضوں میں سے چھ کو علاج کے بعد اسپتال سے چھٹی دے دی گئی ہے جبکہ ایک کی موت ہوچکی ہے۔ وہیں پٹنہ کے پانچ میں سے پانچ مریض صحت یاب ہوگئے ہیں۔

اسی طرح گیا میں پازیٹو مریضوں کی تعداد پانچ، گوپال گنج میں تین، بیگو سرائے میں پانچ، سارن، لکھی سرائے، بھاگلپور اور نوادہ میں ایک۔ ایک مریض ہیں۔ وہیں نالندہ کے کل دو متاثر مریضوں میں سے ایک کو ٹھیک ہونے کے بعد اسپتال سے چھٹی دے دی گئی ہے۔