کشمیر: سری نگر-جموں شاہراہ پر تصادم میں 3 جنگجو ہلاک، ایک پولس اہلکار زخمی

سری نگر:وادی کشمیر کو بیرون دنیا سے جوڑنے والی سری نگر جموں قومی شاہراہ پر نگروٹہ نامی جگہ پر جمعہ کی علی الصبح جنگجوؤں اور سیکورٹی فورسز کے درمیان ہونے والی فائرنگ میں 3 مشتبہ جنگجو ہلاک جبکہ جموں وکشمیر پولس کا ایک اہلکار زخمی ہوگیا- سرکاری ذرائع نے بتایا کہ جموں سے کشمیر کی طرف آرہے ایک ٹرک کو جمعہ کی علی الصبح جب نگروٹہ کے بن ٹول پلازہ کے پاس پولس اہلکاروں نے رکنے کا اشارہ کیا تو اس میں سوار جنگجوؤں نے فائرنگ کردی جس کے نتیجے میں پولیس کا ایک اہلکار زخمی ہوگیا- انہوں نے کہا کہ پولس کی جوابی کارروائی میں ایک جنگجو مارا گیا جس کی شناخت کا عمل جاری ہے-

ذرائع نے بتایا کہ ٹرک میں سوار باقی جنگجو جن کی تعداد دو سے تین بتائی جارہی ہے، موقع سے فرار ہونے میں کامیاب ہوگئے- تاہم سیکورٹی فورسز نے پورے علاقے کو محاصرے میں لیا اور مزید دو جنگجوؤں کو ہلاک کر دیا- سیکورٹی فورسز نے ٹرک ڈرائیور کو حراست میں لے کر اس سے پوچھ گچھ شروع کردی ہے-

دریں اثنا انتظامیہ نے احتیاطی طور پر سری نگر جموں قومی شاہراہ پر گاڑیوں کی آمد ورفت روک دی ہے-اس کے علاوہ ادھم پور میں شاہراہ پر واقع تعلیمی اداروں میں تعطیل کا اعلان کیا گیا ہے- بتا دیں کہ نگروٹہ میں فوج اور جموں وکشمیر پولیس کی اہم تنصیبات واقع ہیں-