کتابوں کے شائقین کے لئے خوشخبری: پٹنہ کے گاندھی میدان میں 8 نومبر سے کتاب میلہ

میلے کے کنوینر امت جھا نے بدھ کے روز نامہ نگاروں سے بتایا کہ سینٹر فار ریڈر شپ ڈیولپمنٹ (سی آر ڈی) کے ذریعہ منعقد ہونے والے اس کتاب میلے میں ہندی سمیت مختلف زبانوں کے قریب 110 پبلیشر حصہ لے رہے ہیں۔

تصویر سوشل میڈیا
تصویر سوشل میڈیا

یو این آئی

پٹنہ: بہار کے دار الحکومت پٹنہ کے تاریخی گاندھی میدان میں آئندہ 8 سے 18 نومبر تک پٹنہ کتاب میلے کا انعقاد کیا گیا ہے۔ میلے کے کنوینر امت جھا نے بدھ کے روز نامہ نگاروں سے بتایا کہ سینٹر فار ریڈر شپ ڈیولپمنٹ (سی آر ڈی) کے ذریعہ منعقد ہونے والے اس کتاب میلے میں ہندی سمیت مختلف زبانوں کے قریب 110 پبلیشر حصہ لے رہے ہیں۔ انہوں نے کہا کہ قریب ڈھائی سال کے وقفے کے بعد کتاب میلے کا ایک بار پھر انعقاد کیا جا رہا ہے۔

اس سے قبل کتاب میلے کا انعقاد گیان بھون میں کیا گیا تھا لیکن پبلشروں اور کتاب کے شائقین سے ملے رد عمل اور مشوروں کے مد نظر اسے پھر گاندھی میدان میں منعقد کرنے کا فیصلہ لیا گیا ہے۔

امت جھا نے بتایا کہ کتاب میلے کے اس سال کی تھیم ”درخت، پانی اور زندگی“ ہے اس بار کا کتاب میلہ خاص طور سے ماحولیات کے تئیں محبت اور بیداری پر مرکوز ہے۔ اس دوران خصوصی طور سے ماحولیات کو لے کر بیداری کے لئے پروگرام منعقد ہو ں گے۔ اس سمت میں میلہ احاطہ میں واقع آڈیٹوریم، اسٹیجوں اور ڈویژنوں کے نام درختوں کے ناموں پر رکھے گئے ہیں۔ جیسے ” پیپل پرشاسنک بھون‘، تلسی مکتاکاش منچ، آم سبھا گار، اور برگد رنگ بھومی وغیرہ۔ اس قسم کے میلے میں چھ بلاک ہوں گے جن کے نام باالترتیب نیم، سیمل، پلاش، گل مہر، کدم اور اشوک وغیرہ درختوں کے نام پر ہوں گے۔