لکھنؤ کی کولکاتہ پر 75 رنز کی ’سپرجائنٹ‘جیت

لکھنؤ سپرجائنٹس نے آئی پی ایل میچ میں کولکاتہ نائٹ رائڈرس کے خلاف 75 رنز کی زبردست جیت حاصل کی۔ لکھنؤ نے پہلے بلے بازی کرتے ہوئے 20 اوور میں سات وکٹوں کے نقصان پر 176 رنز بنائے۔ جواب میں کولکاتہ کی ٹیم 14 اوورز میں صرف 101 رنز پر ڈھیر ہوگئی۔

کولکاتہ کی جانب سے آندرے رسل نے 19 گیندوں میں 45 رنز بنائے۔ رسل کے علاوہ آج کے کے آر کا کوئی بھی بلے باز اپنی چھاپ نہیں چھوڑ سکا۔لکھنؤ کے لیے اویش خان نے اپنے تین اووروں میں 19 رن دے کر تین وکٹ لیے، جب کہ جیسن ہولڈر نے 2.3 اوور میں 31 رن دے کر تین وکٹ لیے۔

کولکاتہ نے ٹاس جیت کر پہلے گیند بازی کا فیصلہ کیا۔ لکھنؤ کی جانب سے بلے بازی کے لیے آنے والے کپتان کے ایل راہول بدقسمت رہے اور پہلے اوور کی پانچویں گیند پر بغیر کوئی رن بنائے رن آؤٹ ہوگئے۔ اس کے باوجود اوپنر کوئنٹن ڈی کاک اور نمبر 3 دیپک ہڈا نے سپر جائنٹس کو اچھی شروعات دلائی۔ دونوں نے دوسری وکٹ کے لیے 39 گیندوں میں 71 رنز جوڑے۔

ڈی کاک نے 29 گیندوں میں 50 رنز بنائے جبکہ دیپک ہڈا نے 27 گیندوں میں 41 رنز بنائے۔ کرونال پانڈیا نے 27 گیندوں پر 25 اور آیوش بدونی نے 18 گیندوں پر صرف 15 رنز بنائے۔ مارکس اسٹونیس کے 28 اور ہولڈر کے 13 رنز کی بدولت لکھنؤ نے کولکاتہ کے سامنے 176 رنز کا ہدف دیا۔

کولکاتہ کی جانب سے رسل نے تین اوورز میں 22 رنز دے کر دو وکٹیں حاصل کیں جبکہ ٹم ساؤتھی، شیوم ماوی اور سنیل نارائن نے ایک ایک وکٹ حاصل کی۔ ہدف کا تعاقب کرتے ہوئے کولکاتہ کبھی بھی تال میں نظر نہیں آیا۔ کے کے آر کے اوپنر بابا اندرجیت نے چھ گیندوں پر صفر اور ایرون فنچ نے 14(14) رن بنائے۔ کپتان شریاس ائیر نے نو گیندوں میں چھ رنز بنائے جبکہ نتیش رانا گیارہ گیندوں میں صرف دو رنز ہی بنا سکے۔

سات اووروں میں 25 رنز پر چار وکٹ گنوانے والے کولکاتہ کو آندرے رسل کی صورت میں امید کی کرن نظر آئی۔ رسل نے 19 گیندوں پر 45 رنز کی اننگز کھیلی جس میں انہوں نے پانچ چھکے اور تین چوکے لگائے۔ اویش خان نے میچ کے 13ویں اوور کی اپنی تیسری اور دوسری گیند پر رسل کو آؤٹ کر کے کولکاتہ کے لیے میچ تقریباً ختم کر دیا۔ اس کے بعد کولکاتہ 15ویں اوور کی تیسری گیند تک ہی کھیل سکی اور 101 رنز کے اسکور پر آل آؤٹ ہوگئی۔

75 رنز کی اس بڑی فتح کے ساتھ ہی لکھنؤ پوائنٹس ٹیبل میں پہلی پوزیشن پر پہنچ گیا ہے۔ اس کے ساتھ ہی کے کے آر پوائنٹس ٹیبل کی آٹھویں پوزیشن پر کھسک گئی اور اس کے پلے آف میں جگہ بنانے کے امکانات بھی نہ ہونے کے برابر رہ گئے۔