کلاسن نےہاری ہوئی بازی کو تقریباً پلٹ دیا تھا لیکن کولکتہ چار رن سے جیتا

انڈین پریمیئر لیگ (آئی پی ایل) 2024 کے میچ نمبر 3 میں، کولکتہ نائٹ رائیڈرز یعنی کے کے آرنے سن رائزرز حیدرآباد کو چار رنز سے شکست دی۔ کولکتہ کے ایڈن گارڈنز میں ہفتہ (23 مارچ) کو کھیلا جانے والا یہ میچ بہت ہی سنسنی خیز رہا۔ میچ میں کولکتہ نائٹ رائیڈرز نے سن رائزرز حیدرآباد کو جیت کے لیے 209 رنز کا ہدف دیا تھا۔

اس کا تعاقب کرتے ہوئے سن رائزرس حیدرآباد نے 145 رنز پر پانچ وکٹ گنوا دیے اور اسے آخری تین اووروں میں 60 رنز درکار تھے۔ ایسے میں ایسا لگ رہا تھا کہ سن رائزرس حیدرآباد کی ٹیم ہدف کے قریب بھی نہیں پہنچ پائے گی۔ لیکن جنوبی افریقہ کے کھلاڑی ہینرک کلاسن نے سن رائزرز کو تقریباً اپنے بل بوتے پر ہارا ہوا میچ جتوا نے کے قریب لے آیا۔

کلاسن اور شہباز احمد نے مل کر اسپنر ورون چکرورتی کے خلاف 18ویں اوور میں 21 رنز بنائے جس میں سے 15 رنز کلاسن کے بلے سے آئے۔ اس کے بعد کلاسن نے آئی پی ایل کی تاریخ کے سب سے مہنگے کھلاڑی مچل اسٹارک کا نوٹس لیا اور 19ویں اوور میں انہیں تین چھکے مارے۔ اس اوور میں ا سٹارک نے مجموعی طور پر 26 رنز دئے۔ یعنی آخری اوور میں سن رائزرس حیدرآباد کو جیت کے لیے 13 رنز بنانے تھے۔

میچ کا آخری اوور فاسٹ بولر ہرشیت رانا نے کروایا۔ اس اوور کی پہلی گیند پر کلاسن نے چھکا لگایا۔ اب سن رائزرز کو جیت کے لیے پانچ گیندوں میں سات رنز بنانے تھے۔ یعنی سن رائزرز کی جیت اب یقینی نظر آرہی تھی۔ لیکن ایسا نہیں ہوا۔ اوور کی دوسری گیند پر کلاسن نے ایک رن لے کر شہباز احمد کو اسٹرائیک دی۔ تاہم، شہباز کلاسن کے اعتماد پر پورا نہیں اتر سکے اور ہرشیت نے انہیں لانگ آن پر کھڑے شریاس ائیر کے ہاتھوں کیچ آؤٹ کرا دیا۔

اب سن رائزرز کو جیت کے لیے تین گیندوں میں 6 رنز درکار تھے۔ چوتھی گیند پر مارکو جانسن نے سنگل لے کر کلاسن کو سٹرائیک دی۔ لیکن پانچویں گیند پر بڑا شاٹ مارنے کی کوشش میں کلاسن آؤٹ ہو گئے ۔ اب آخری گیند پر پانچ رنز بنانے تھے لیکن کپتان پیٹ کمنز ایک بھی نہ لے سکے۔

اس میں کوئی دو رائے نہیں کہ ہینرک کلاسن نے طوفانی اننگز کھیل کر ایک وقت کے کے آر کی حالت ضرور خراب کر دی تھی۔ کلاسن نے 29 گیندوں میں 63 رنز بنائے جس میں آٹھ چھکے شامل تھے۔ کلاسن کے علاوہ اوپنر بلے باز میانک اگروال اور ابھیشیک شرما نے 32-32 رنز بنائے۔ کے کے آرکی جانب سے ہرشیت رانا نے سب سے زیادہ تین وکٹیں حاصل کیں، جبکہ 'پلیئر آف دی میچ' آندرے رسل نے دو وکٹیں حاصل کیں۔

اس سے قبل ٹاس ہارنے کے بعد پہلے بلے بازی کرنے آئی کولکتہ نائٹ رائیڈرز کی شروعات انتہائی خراب رہی اور 51 رنز پر چار وکٹیں گنوا دیں۔ اس کے بعد وکٹ کیپر فل سالٹ اور رمندیپ سنگھ کے درمیان 54 رنز کی شراکت ہوئی جس نے کے کے آر کو رفتار فراہم کی۔ سالٹ نے 54 اور رمندیپ نے 35 رنز بنائے۔ سالٹ رمندیپ کے آؤٹ ہونے کے بعد کیریبین استاد آندرے رسل کا شو دیکھنے کو ملا۔

رسل کی طوفانی بلے بازی سے کولکتہ نے سات وکٹوں پر 208 رنز بنائے۔ رسل اور رنکو سنگھ (23) کے درمیان ساتویں وکٹ کے لیے 81 رنز کی شراکت ہوئی۔ آندرے رسل نے 25 گیندوں پر ناقابل شکست 63 رنز بنائے جس میں تین چوکے اور سات چھکے شامل تھے۔ سن رائزرس حیدرآباد کے لیے تیز گیند باز ٹی نٹراجن نے سب سے زیادہ تین وکٹیں حاصل کیں۔