آئی پی ایل 2020: پنجاب کے کپتان راہل نے راجستھان سے ملی ہار کا ذمہ دار ٹاس کو ٹھہرایا

ابو ظہبی: آئی پی ایل 2020 کے 50 ویں مقابلہ میں کنگز الیون پنجاب کو راجستھان رائلز نے سات وکٹ سے ہرایا۔ ٹاس جیت کر پہلے بلے بازی کرنے کے لئے اتری کنگز الیون پنجاب کی ٹیم نے کرس گیل (99) اور کے ایل راہل (46) کی اننگز کی بدولت 20 اوورز میں 4 وکٹ کھو کر 185 رنز بنائے۔ ہدف کا تعاقب کرنے اتری راجستھان کی طرف سے بین اسٹوکس (50) اور سنجو سیمسن (48) نے زبردست بلے بازی کرتے ہوئے ٹیم کو جیت سے ہمکنار کر دیا۔

پنجاب کے کپتان کے ایل راہل کا کہنا ہے کہ انہیں ٹاس ہارنے کا خمیازہ اٹھانا پڑا کیونکہ بعد میں پچ بلے بازی کے لئے سازگار ہو گئی تھی اور اوس گرنے کی وجہ سے گیند پر پکڑ بنانا مشکل ہو رہا تھا۔ کے ایل راہل نے میچ کے بعد کہا، ’’ٹاس گنوانا کافی مایوس کن رہا کیونکہ بعد میں کافی اوس گری اور بعد میں بلے بازی کرنا کافی آسان ہو گیا۔ کلائی کے اسپنر چاہتے تھے کہ گیند خشک رہے اور سطح سے گیند گرپ ہو لیکن اوس کی وجہ سے یہ کافی مشکل ہو گیا۔ تاہم جب ہم بلے بازی کر رہے تھے تو اسکور برا نہیں تھا۔‘‘

راہل نے کہا کہ ان کے گیند بازوں نے خراب گیندبازی نہیں کی۔ انہوں نے کہا، ’’ہم نے خراب گیندبازی نہیں کی لیکن ہمیں نم گیند کے ساتھ بہتر گیند بازی کرنا سیکھنا ہوگا۔ اوس کی پیشن گوئی نہیں کی جا سکتی۔ ہم نے میدان کے اہلکاروں سے بات کی تھی اور انہوں نے کہا تھا کہ گزشتہ میچ میں اوس نہیں تھی۔ آپ اس کے لئے تیاری نہیں کر سکتے، بس آپ کو ان چیزوں کے ساتھ تال میل بیٹھانا ہوگا۔‘‘

واضح رہے کہ آئی پی ایل کے موجودہ 13 ویں سیزن میں لگاتار دوسرا میچ جیت کر راجستھان رائلز بھی پلے آف کی ریس میں برقرار ہے۔ اسٹیو اسمتھ کی قیادت والی راجستھان کی ٹیم پوئنٹس ٹیبل میں 5ویں مقام پر پہنچ گئی ہے۔ دوسری طرف پنجاب کو آئی پی ایل کے اس سیزن میں چھ میچوں میں جیت ملی جبکہ اس نے ساتھ میں ہار کا سامنا کیا ہے۔ وہیں اس سیزن میں 7 واں مقابلہ ہارنے والی کنگز الیون پنجاب چوتھے مقام پر قابض ہے۔ ممبئی پلے آف میں داخل ہو چکی ہے اور چنئی باہر ہو چکی ہے۔ بقیہ تمام ٹیموں کے پاس پلے آف تک رسائی حاصل کرنے کا موقع برقرار ہے۔‘‘