آئی پی ایل میچ نمبر 31: گیل کے طوفان میں اڑ گیا بنگلور، پنجاب کی 8 وکٹ سے فتح

آئی پی ایل سیزن 13 کے اکتیسویں مقابلے میں آج رائل چیلنجرس بنگلور کے کپتان وراٹ کوہلی کو گیل کے طوفان نے زبردست جھٹکا دیا۔ کنگز الیون پنجاب کے خلاف بڑی جیت حاصل کر پوائنٹس ٹیبل میں نمبر وَن مقام پر قبضہ جمانے کی خواہش رکھنے والے کپتان کوہلی کو ایک بڑی جیت نہیں بلکہ بڑی ہار ہاتھ لگی۔ پنجاب کے سلامی بلے بازوں راہل اور مینک کے بعد کرس گیل کے طوفان نے بنگلور کو 8 وکٹ سے شکست فاش دے دی۔

رائل چیلنجرس بنگلور کے کپتان وراٹ کوہلی نے ٹاس جیتنے کے بعد ایک بار پھر بلے بازی کرنے کا فیصلہ کیا تھا۔ سلامی بلے بازوں نے شروعات بھی ٹھیک ٹھاک دے دی تھی کیونکہ دیودت پڈیکل (12 گیند میں 18 رن) جب پہلے وکٹ کی شکل میں آؤٹ ہوئے تو ٹیم کا اسکور 4.1 اوور میں 38 رن تھا۔ اس کے بعد دوسرے سلامی بلے باز ایرون فنچ (18 گیندوں میں 20 رن) جب آؤٹ ہوئے تو 6.3 اوور میں اسکور 62 رن ہو گیا تھا۔ اس کے بعد وراٹ کوہلی نے اپنے فارم کو برقرا ررکھتے ہوئے رن بنانے کا سلسلہ شروع کیا۔

واشنگٹن سندر اور شیوم دوبے نے کپتان کوہلی کے ساتھ چھوٹی چھوٹی لیکن اہم شراکت داریاں کیں۔ سندر 14 گیندوں پر 13 رن بنا کر آؤٹ ہوئے جب کہ شیوم دوبے نے 19 گیندوں پر 23 رن بنائے۔ اس کے بعد کوہلی کا ساتھ دینے اے بی ڈیویلیرس میدان میں آئے، لیکن اس بار وہ کچھ خاص کارنامہ انجام نہیں دے سکے۔ محمد سمیع نے انھیں محض 2 رنوں پر پویلین بھیج دیا۔ وراٹ کوہلی بدقسمت رہے کہ وہ 39 گیندوں پر 48 رن بنا کر محمد سمیع کے ہی شکار ہو گئے اور نصف سنچری مکمل نہیں کر سکے۔ اس وقت ٹیم کا اسکور 17.5 اوور میں 6 وکٹ کے نقصان پر 136 رن تھا۔

آخر کے دو اووروں میں کرس مورس اور اوسورو اڈانا نے مل کر بہت تیزی کے ساتھ رن بنائے اور کوئی وکٹ بھی نہیں گرنے دیا۔ کرس مورس نے 3 چھکّوں اور 1 چوکا کی مدد سے 8 گیندوں پر 25 رن بنائے، جب کہ اڈانا نے 1 چھکا کی مدد سے 5 گیندوں پر 10 رن بنائے۔ مقررہ 20 اوور میں بنگلور 171 رن بنانے میں کامیاب ہو گئی۔

پنجاب کی طرف سے گیندبازی میں مروگن اشون اور کرس جورڈن ہی کفایتی گیندبازی کر سکے، بقیہ نے کافی رن دیے۔ اشون نے 4 اوور میں 23 رن دے کر 2 وکٹ لیے جب کہ جورڈن نے 3 اوور میں 20 رن دے کر 1 وکٹ لیا۔ 2 وکٹ محمد سمیع کو ملے لیکن انھوں نے 4 اوور میں 45 رن خرچ کر دیے۔ عرش دیپ سنگھ نے بھی 2 اوور میں 20 رن دیے اور ایک وکٹ حاصل کیا۔ روی بشنوئی اور میکسویل کو کوئی وکٹ نہیں ملا جنھوں نے بالترتیب 3 اوور میں 29 رن اور 4 اوور میں 28 رن دیے۔

پنجاب کی ٹیم 172 رنوں کے ہدف کا پیچھا کرنے کے لیے بہت مضبوطی کے ساتھ میدان میں اتری۔ انھیں یہ میچ جیتنا بہت ضروری تھا کیونکہ وہ پوائنٹس ٹیبل میں آخری مقام پر ہے۔ سلامی بلے بازوں کے ایل راہل اور مینک اگروال نے اس بات کا بہت اچھا خیال بھی رکھا اور ایک ایسی شروعات ٹیم کو دی جس نے جیت کی راہ ہموار کی۔ دونوں کے درمیان 8 اوور میں 78 رن کی شراکت داری ہوئی اور یہ پارٹنرشپ اس وقت ٹوٹی جب یجویندر چہل نے اگروال کو بولڈ کر دیا۔ انھوں نے محض 25 گیندوں پر 3 چھکّوں اور 4 چوکوں کی مدد سے 45 رن بنائے۔ لیکن آتش بازی تو اس کے بعد شروع ہوئی جب اس سیزن میں پہلا میچ کھیل رہے کرس گیل میدان میں اترے۔

کرس گیل نے شروع میں سنبھل کر کھیلنا شروع کیا اور دوسری طرف کپتان کے ایل راہل نے رنوں کی رفتار بڑھانے کا ذمہ سنبھال لیا۔ لیکن 7 رن کے انفرادی اسکور پر جب کرس گیل نے پہلا چھکّا لگایا تو پھر اس کے بعد ان کی طوفانی بلے بازی دیکھ کر پرانے دن یاد آ گئے۔ کرس گیل 20ویں اوور کی پانچویں گیند پر رَن آؤٹ ہوئے جب ٹیم کو جیت کے لیے محض ایک رن کی ضرورت تھی۔ گیل نے 5 شاندار چھکوں اور 1 چوکا کی مدد سے 45 گیندوں پر 53 رن بنائے۔ آخر گیند پر جب ایک رن کی ضرورت تھی اور بنگلور یہ امید لگائے بیٹھی تھی کہ کھلاڑی کو آؤٹ کر میچ کو سپر اوور میں لے جایا جائے، تو نئے بلے باز نکولس پورن نے یجویندر چہل کی گیند پر کافی اونچا چھکّا لگا دیا اور ٹیم کو ایک ضروری جیت سے ہمکنار کر دیا۔ کے ایل راہل نے کپتانی پاری کھیلتے ہوئے ناٹ آؤٹ 61 رن (49 گیندوں پر 5 چھکّوں اور 1 چوکا کی مدد سے) بنائے۔

بنگلور کی جانب سے کرس مورس اور نودیپ سینی نے بہترین گیندبازی کا مظاہرہ کیا۔ ان دونوں نے 4-4 اوور میں بالترتیب 22 اور 21 رن دیے، حالانکہ انھیں کوئی وکٹ حاصل نہیں ہوا۔ صرف ایک وکٹ یجویندر چہل کو ملا جنھوں نے 3 اوور میں 35 رن خرچ کر دیے۔ اسورو اڈانا نے 2 اوور میں 14 رن اور واشنگٹن سندر نے 4 اوور میں 38 رن خرچ کیے، جب کہ محمد سراج سب سے خرچیلے ثابت ہوئے جنھوں نے 3 اوور میں 44 رن دے ڈالے۔