آئی پی ایل 2020: عبد الصمد کرکٹ کے تمام فارمیٹس کے بہترین کھلاڑی... کوچ رندھیر سنگھ

جموں: 'سن رائزرس حیدرآباد' کے لئے کھیلنے والے جموں و کشمیر کے ضلع راجوری کے نوجوان کرکٹر عبد الصمد کے پہلے کوچ رندھیر سنگھ جموال نے کہا ہے کہ صمد ایک مایہ ناز بلے باز ہیں اور کرکٹ کے تمام فارمیٹس میں اپنی صلاحیتوں کا لوہا منوانے کی صلاحیت رکھتے ہیں۔ بتادیں کہ صمد نے آئی پی ایل کے اپنے پہلے ہی میچ میں بہترین کارکردگی کا مظاہرہ کر کے دنیائے کرکٹ میں اپنا نام روشن کر دیا ہے۔

رندھیر سنگھ جموال نے یو این آئی کے ساتھ عبد الصمد کی صلاحیتوں پر بات کرتے ہوئے کہا کہ 'صمد ایک آل راؤنڈر کھلاڑی ہیں اور کرکٹ کے تمام فارمیٹس میں آج کل آل راؤنڈرس کی ہی زیادہ ضرورت ہے'۔ انہوں نے کہا کہ صمد کرکٹ کے تمام فارمیٹس میں اپنی صلاحیتوں کا لوہا منوانے کی صلاحیت رکھتے ہیں۔

رندھیر سنگھ جموال نے صمد کے ان کی اکیڈیمی میں نیٹ سیشن جوائن کرنے کے ایام کو یاد کرتے ہوئے کہا کہ 'صمد نے سال 2012 میں میری اکیڈیمی کو جوائن کیا اور اس کے بعد انہوں نے انڈر 14، انڈر 16 اور انڈر 19 کرکٹ ٹورنامنٹس میں جموں و کشمیر کی نمائندگی کی'۔ انہوں نے کہا کہ ہندوستان کے سابق کرکٹر عرفان پٹھان نے جب جموں و کشمیر کرکٹ ایسوسی ایشن جوائن کی، اس نوجوان کھلاڑی کی کافی حوصلہ افزائی کی۔

موصوف نے کہا کہ صمد کی کامیابی کا سفر اس دن سے شروع ہوا جب انہوں نے ٹی 20 اور ڈومیسٹک کرکٹ میں مسلسل بہترین کارکردگی کا مظاہرہ کیا۔ انہوں نے کہا کہ اگر ان کی آئی پی ایل میں کار کردگی مسلسل بہتر رہی تو وہ سیلکٹروں کی نظروں میں ضرور رہیں گے۔ دریں اثنا عبد الصمد کے والد فاروق احمد، جو پیشے کے لحاظ سے ایک فزیکل ایجوکیشن ٹیچر ہیں، نے کہا کہ میں صمد اور اس کے بڑے بھائی طیب فاروق کو ایک پرائیویٹ اکیڈمی میں بھیجنا چاہتا تھا لیکن مالی کمزوری کی وجہ سے میں ایسا نہیں کرسکا۔

فاروق احمد نے کہا کہ میں نے پھر صمد کو رندھیر سنگھ کی اکیڈمی میں ڈالا جہاں انہوں نے صمد کی بہترین تربیت کی۔ موصوف نے عرفان پٹھان اور جموں و کشمیر کرکٹ ایسوسی ایشن کی ٹیم کے کپتان پرویز رسول کا بھی شکریہ ادا کرتے ہوئے کہا کہ انہوں نے صمد کی صلاحیتوں کو نکھارا۔ انہوں نے کہا کہ صمد کی کامیابی میں ان کی والدہ فرزانہ کوثر کا بھی بڑا رول ہے۔