سیاسی ایجنڈے کے تحت رقم کردہ تاریخ ماضی کا غلط نقشہ پیش کرے گی: اوپندر سنگھ

دنیا کی تاریخ میں ایسا کوئی حکمراں نہیں رہا جس نے امن کی اچھائیوں اور خصوصیات کے بارے میں 2000 سال پہلے اشوک جیسی ایمانداری اور جوش کے ساتھ بات کی ہو۔ جنگ سے ہونے والی تباہی کے بارے میں بات کرتے ہوئے بھی وہ جنگلوں میں رہنے والوں کو سختی کے ساتھ متنبہ کرتے ہیں۔ میرا ماننا ہے کہ انھیں یہ محسوس ہو چکا تھا کہ ایک راجہ کے لیے پوری طرح سے امن پسند رہنا ممکن نہیں ہے۔ ہمیں یہ بھی یاد رکھنا چاہیے کہ اشوک کا بھلے ہی امن میں یقین ہو، لیکن انھوں نے سزائے موت کو ختم نہیں کیا تھا۔ شاید گاندھی اگر حکمراں ہوتے تو انھیں بھی امن کے معاملے میں سمجھوتہ کرنا پڑتا۔

قدیم ہندوستان نے صرف مذہبی صحیفوں کو ہی منظر عام پر نہیں لایا۔ ’پنچ تنتر‘ بہت ہی اثردار اور دلچسپ تخلیق ہے۔ اس کی کہانیاں پورے ایشیا اور یورپ تک پہنچی ہیں۔ ’پنچ تنتر‘ خود کو ایک سیاسی تخلیق مانتا ہے، اس لیے مجھے اس کو بھی مدنظر رکھنا تھا۔ شیر، گیدڑ، بندر، پنچھی، کیڑوں وغیرہ کے بارے میں کہانیاں ہیں اور اس کی کئی کہانیاں اصل میں بے وقوف راجاؤں اور درباریوں کے بارے میں ہیں۔ وہ کہانیاں بہت دلچسپ ہیں، لیکن ان میں سے کئی واقعی میں بہت تشدد آمیز ہیں۔ دشمن کو کس طرح مارا جائے اور مرنے سے کیسے بچا جائے، وہ ان چیزوں کی باتیں کرتی ہیں۔ یہ صلاح بھی دیتی ہیں کہ ایک مشکل دنیا میں کس طرح زندگی بسر کیا جائے اور آگے بڑھا جائے۔ ’پنچ تنتر‘ کا سیاسی نظریہ کئی معنوں میں معاشیات کے نظریہ جیسا ہی ہے۔ دونوں میں سے کوئی بھی اخلاقیات اور مذہب جیسی چیزوں کو لے کر پریشان نہیں ہے۔

میرا ماننا ہے کہ ہر دور میں اور دنیا کے ہر حصے میں تشدد کے عنصر موجود رہے ہیں، لیکن اس کے طور طریقے، شکل اور رفتار بدلتی رہی ہے۔ آج جو ہم اپنے چاروں طرف زیادہ تر تشدد دیکھ رہے ہیں (اور یہ بہت زیادہ ہے)، وہ سیاسی ایجنڈے سے جڑی ہوئی ہے، چاہے وہ قومی سطح پر ہو یا بین الاقوامی سطح پر۔ ہم جو چیز ماضی سے سیکھ سکتے ہیں وہ یہ ہے کہ سیاست اور تشدد آپس میں ہمیشہ سے جڑی رہی ہے، برسراقتدار لوگ ہمیشہ سے اپنے تشدد کو صحیح ٹھہراتے رہے ہیں، اور لوگوں کو ہمیشہ اس پر سوال اٹھانے کی ضرورت ہے۔

اس سلسلے میں واضح طور پر بس یہی کہا جا سکتا ہے کہ سیاسی ایجنڈے کے تحت لکھی گئی تاریخ ہمیشہ ماضی کو توڑ مروڑ کر پیش کرے گی۔

یہ اصول اور روش کا سوال ہے۔ اخلاقی اقدار اور اقتدار پر مبنی سیاست کا سوال ہے۔ قدیم ہندوستانی فلسفیوں کے ایک گروپ نے یہ مانا تھا کہ امن ایک مثبت اصول ہے، لیکن انھیں یہ بھی لگتا تھا کہ راجہ کو حکمرانی کرنے کے لیے ایک ممکنہ حد تک تشدد پسند ہونا چاہیے۔ مہابھارت میں اس کے بارے میں کافی بات کی گئی ہے۔ جائز اور ناجائز تشدد کے درمیان ہم کس طرح ایک لکیر کھینچ سکتے ہیں؟ قدیم ہندوستانی فلسفیوں نے اس سوال کا جواب تلاش کرنے کے لیے کا فی جدوجہد کی۔ لیکن کیا امن کو آج کے سیاسی لیڈروں کے ذریعہ ’پرم دھرم‘ مانا جاتا ہے؟ میں ایسا نہیں مانتی۔ سیاسی، سماجی اور مذہبی تشدد بڑھتی ہوئی معلوم ہو رہی ہے، اور اقتدار میں بیٹھے ہوئے لوگ گہرائی سے اس مسئلہ پر غور و خوض کرتے ہوئے نظر نہیں آ رہے، نہ ہی وہ اس شئے سے اثرانداز طریقے سے نمٹتے ہوئے نظر آ رہے ہیں۔