حلف برداری کے بعد ڈبلیو ایچ او سے علیحدگی کا اعلان کر سکتے ہیں ٹرمپ!

امریکہ کے نومنتخب صدر ڈونالڈ ٹرمپ اپنی کامیابی سے پُرجوش ہیں۔ 20 جنوری کو جب وہ صدر عہدے کا حلف لیں گے تو کئی حیران کرنے والے فیصلے کر سکتے ہیں۔ اطلاع ہے کہ وہ عالمی صحت تنظیم (ڈبلیو ایچ او) کے سلسلے میں بھی کوئی بڑا فیصلہ کرنے والے ہیں۔

رائٹرس کی رپورٹ کے مطابق ٹرمپ اپنی دوسری مدت کار کے پہلے دن عالمی صحت تنظیم (ڈبلیو ایچ او) سے الگ ہونے کا اعلان کر سکتے ہیں۔ اس معاملے میں ان کی ٹرانزیشن ٹیم تیاری کر رہی ہے۔ واشنگٹن میں جارج ٹاؤن یونیورسٹی کے گلوبل ہیلتھ پروفیسر لارینس گاسٹن کا کہنا ہے کہ ٹرمپ ڈبلیو ایچ او سے ہٹنے کا منصوبہ بنا رہے ہیں۔ وہ شاید صدر کے طور پر اپنے پہلے ہی دن اس پر اپنی مہر لگا سکتے ہیں۔

واضح ہو کہ ڈونالڈ ٹرمپ نے شروعات سے ہی کچھ معاملوں کو لے کر اپنا نظریہ کھلے طور پر پیش کیا ہے، اس میں ایک معاملہ ڈبلیو ایچ او کا بھی ہے۔ ٹرمپ نے کئی مواقع پر ڈبلیو ایچ او کو چین کی کٹھ پتلی قرار دیا ہے۔ کورونا دور میں انہوں نے الزام لگایا تھا کہ ڈبلیو ایچ او نے ایک بار بھی اس سانحہ کے لیے چین کی تنقید نہیں کی۔ ایسے میں اس بات کا امکان ظاہر کیا جا رہا ہے کہ ٹرمپ اپنی دوسری مدت کار شروع کرنے کے پہلے دن ہی ڈبلیو ایچ او سے علیحدگی اختیار کرنے کا اعلان کر سکتے ہیں۔

حالانکہ نہ تو ڈونالڈ ٹرمپ نے اور نہ ہی ان کی ٹرانزیشن ٹیم کی طرف سے اس معاملے پر ابھی تک کوئی بیان سامنے آیا ہے۔ اگر امریکہ ڈبلیو ایچ او سے الگ ہوتا ہے تو یہ اس کی گلوبل ہیلتھ پالیسی کے لیے کافی بڑی تبدیلی ہوگی۔ ٹرمپ نے جو اپنی نئی ٹیم بنائی ہے، اسے لے کر کافی تنقید بھی جھیلنی پڑ رہی ہے۔ ٹرمپ نے رابرٹ کینیڈی جونیئر کو وزیر صحت بنایا ہے۔ رابرٹ کینیڈی کو ویکسین مخالف مانا جاتا ہے۔ ان کا کہنا ہے کہ ویکسین سے جسم میں کئی دقتیں ہو جاتی ہیں۔

ایسا پہلی بار نہیں ہے جب امریکہ کے ڈبلیو ایچ او سے الگ ہونے کی بحث ہو رہی ہو، اس سے پہلے 2019 میں بھی جب ٹرمپ امریکہ کے صدر تھے، تب انہوں نے اس عالمی صحت تنظیم سے الگ ہونے کا فیصلہ کر لیا تھا۔ اس سلسلے میں عمل بھی شروع ہو چکا تھا لیکن 6 مہینے بعد ہی جو بائیڈن نے اقتدار میں آنے کے بعد ٹرمپ کا فیصلہ پلٹ دیا۔ اب ٹرمپ دوبارہ اقتدار سنبھالنے جا رہے ہیں تو ایسا مانا جا رہا ہے کہ وہ جلد ہی اس سلسلے میں کوئی اعلان کریں گے۔