امریکہ نے باقی یرغمالیوں کی فوراً رہائی کے لیے حماس کو انتباہ کیا، 3 قیدی رہائی کے بعد اسرائیل پہنچے

امریکہ کے وزیر خارجہ مارکو روبیو نے صدر ٹرمپ کی بات کو دہراتے ہوئے کہا ہے کہ حماس کو اب سبھی یرغمالیوں کو آزاد کرنا ہوگا۔ 490 دنوں تک قید میں رہنے کے بعد ایلی، آر لیوی اور عہد اپنے ملک اسرائیل واپس ہو گئے ہیں۔ اس دوران روبیو نے حماس کو انتباہ کیا کہ وہ جلد ہی باقی یرغمالیوں کو رہا کر دے۔ ادھر اسرائیل نے اس بات کی تصدیق کی ہے کہ حماس نے بات چیت کے بعد تین یرغمالیوں کو رہا کر دیا ہے۔ آئی ڈی ایف نے ہفتہ کو یہ اطلاع دی تھی کہ تین یرغمالی عہد بین عمی، ایلی شیرابی اور آر لیوی کو ریڈ کراس کو سپرد کر دیا گیا تھا، جہاں سے انہیں اسرائیل پہنچایا گیا۔

غزہ میں قیدی بنائے گئے لوگ جب اسرائیل پہنچے تو آئی ڈی ایف اور شِن بیٹ فورسز نے ان کا استقبال کیا۔ حالانکہ یہ تینوں کمزور دکھائی دے رہے تھے جس سے ان کے اہل خانہ کو کافی تشویش ہوئی۔ ان تینوں کو لوگوں کو پھر فوراً ابتدائی علاج کے جائزہ کے لیے بھیجا گیا تھا۔

ٹائمز آف اسرائیل کی رپورٹ کے مطابق جب ان یرغمالیوں کو رہا کیا گیا تو اس سے پہلے حماس کے ذریعہ ایک عوامی تقریب کا انعقاد کیا گیا تھا۔ تقریب میں ایک نقاب پوس حماس کارکن نے کچھ تقریر کی پھر تینوں یرغمالیوں کو سرٹیفکیٹ دیا گیا اور منچ پر پریڈ کرائی گئی۔

وہیں اب اسرائیل بھی معاہدے کے تحت نیگیو میں کیجیوٹ جیل اور ویسٹ بینک میں اوفر جیل سے 183 فلسطینی سلامتی اہلکار قیدیوں کو رہا کرنے کی تیاری کر رہا ہے۔ ان قیدیوں میں 18 ایسے ہیں جو عمر قید کی سزا کاٹ رہے ہیں۔ 183 میں سے 111 قیدیوں کو جنگ کے دوران گرفتار کیا گیا تھا باقی بچے 72 قیدی ویسٹ بینک اور مشرقی یروشلم سے ہیں۔