امریکہ نے کورونا ویکسین کے دوسرے بوسٹر شاٹ کی دی منظوری

واشنگٹن: ادارہ فوڈ اینڈ ڈرگ ایڈمنسٹریشن (ایف ڈی اے) نے اپنے بیان میں کہا کہ امریکہ میں فائزر اور موڈیرنا ویکسین کی چوتھی ڈوز تیسری ڈوزکے 4 ماہ بعد لگائی جاسکےگی۔ ایف ڈی کے مطابق کورونا ویکسین کا دوسرا بوسٹر شاٹ 50 سال سے زائد عمرکے افراد کو لگایا جاسکےگا، جب کہ کمزور قوت مدافعت والے 12 سال سے زائد عمر بچوں کو فائزر کا دوسرا بوسٹر شاٹ دیا جاسکے گا۔

اس کے علاوہ کمزور قوت مدافعت والے 18 سال سے زائد عمر کے افراد موڈیرنا کی دوسرا بوسٹر ڈوز لگوا سکتے ہیں، دوسری ڈوز کا مقصد شدید بیماری اور اسپتال میں داخل ہونے کے خلاف مزید تحفظ دینا ہے۔ وائٹ ہاؤس کی کمیونیکیشن ڈائریکٹر کیٹ بیڈنگ فیلڈ نے ایک پریس کانفرنس میں بتایا کہ کورونا بوسٹرڈوزکی دوسری خوراک کی منظوری اچھا فیصلہ ہے۔ امریکی صدر جو بائیڈن کے دوسرے بوسٹر ڈوز لگوانے سے متعلق انہوں نے کہا کہ معالج کے مشورے کے بعد جو بائیڈن ڈوز لگوانے کا فیصلہ کریں گے۔