امریکی صدر ٹرمپ کا میکسیکو اور کینیڈا پر 25 فیصد ٹیرف 30 دنوں کے لیے ملتوی کرنے کا فیصلہ

کینیڈا کے وزیر اعظم جسٹن ٹروڈو نے اعلان کیا ہے کہ امریکی صدر ڈونلڈ ٹرمپ نے کینیڈا سے درآمدات پر مجوزہ امریکی ٹیرف کو 30 دنوں کے لیے ملتوی کرنے پر رضامندی ظاہر کی ہے۔ یہ فیصلہ میکسیکو سے درآمدات پر بھی اسی طرح کے التوا کے بعد لیا گیا ہے۔ دونوں ممالک نے امریکہ میں اسمگلنگ کو روکنے کے لیے ٹھوس اقدامات اٹھانے پر رضامندی ظاہر کی تھی۔

ٹرمپ نے ہفتہ کو اعلان کیا تھا کہ وہ کینیڈا اور میکسیکو سے درآمد شہد اشیاء پر 25 فیصد ٹیرف عائد کریں گے، جبکہ چین سے درآمد شدہ اشیاء پر بھی 10 فیصد ٹیرف عائد کرنے کا فیصلہ لیا تھا۔ انہوں نے کینیڈا سے درآمد شدہ توانائی کے وسائل پر بھی 10 فیصد ٹیرف عائد کرنے کا منصوبہ بنایا تھا۔

اگرچہ، ٹروڈو نے انتباہ دیا تھا کہ اگر یہ ٹیرف عائد ہوتے ہیں تو کینیڈا کو 155 بلین کی امریکی اشیاء پر 25 فیصد ٹیرف عائد کرے گا لیکن پیر کو ٹروڈو نے ایکس پر پوسٹ میں اطلاع دی کہ ٹرمپ کے ساتھ ان کے مذاکرات کامیاب رہے اور ٹیرف کو 30 دنوں کے لیے ملتوی کرنے کا فیصلہ لیا گیا ہے۔

فینٹینائل اسمگلنگ کو روکنے کے لیے اٹھائے گئے اقدامات اس پابندی کی ایک اہم وجہ ہیں۔ ٹروڈو نے بتایا کہ کینیڈا نے فینٹینائل اسمگلنگ پر قابو پانے کے لیے ’فینٹینائل زار‘ مقرر کرنے اور سرحدی سکیورٹی کو مضبوط بنانے کے لیے 1.3 بلین ڈالر کی منصوبہ بندی کی ہے۔ اس منصوبے کے تحت نئے ہیلی کاپٹر، ٹیکنالوجی، اور 10,000 فرنٹ لائن ورکرز کے ساتھ کینیڈا-امریکہ سرحد کی سکیورٹی کو مزید مستحکم کیا جائے گا۔ ٹروڈو نے لکھا کہ ہمارے امریکی شراکت داروں کے ساتھ تعاون کو بڑھا کر فینٹینائل کی فراہمی کو روکنے کے لیے ضروری اقدامات کیے جائیں گے۔

امریکی صدر ڈونلڈ ٹرمپ نے میکسیکو پر عائد کیے گئے ٹیرف کو ایک ماہ کے لیے معطل کرنے کا فیصلہ کیا ہے۔ میکسیکو کی صدر کلاڈیا شینبام نے پیر کے روز اعلان کیا کہ یہ فیصلہ امریکی صدر کے ساتھ ہونے والی بات چیت کے بعد کیا گیا۔ اس فیصلے کی تصدیق وائٹ ہاؤس کی جانب سے بھی کی گئی ہے۔ میکسیکو پر عائد کیے گئے ٹیرف کو معطل کرنے سے دونوں ممالک کے درمیان معاشی تناؤ عارضی طور پر کم ہو گیا ہے۔ تاہم، اس دوران یہ دیکھنا دلچسپ ہوگا کہ ڈونلڈ ٹرمپ اب چین کے حوالے سے کیا فیصلہ کرتے ہیں کیونکہ چین بھی ان ممالک میں شامل ہے جن پر ٹیرف نافذ کیا گیا ہے۔