ٹرمپ کا کینیڈا پر 35 فیصد ٹیرف کا اعلان، قومی سلامتی کو بنایا بنیاد

واشنگٹن: امریکہ کے صدر ڈونلڈ ٹرمپ نے کینیڈا کے خلاف ایک اقتصادی اقدام کرتے ہوئے اعلان کیا ہے کہ یکم اگست 2025 سے امریکہ میں داخل ہونے والی تمام کینیڈین مصنوعات پر 35 فیصد ٹیرف (درآمدی محصول) عائد کیا جائے گا۔ اس فیصلے کو کینیڈا کی جانب سے جوابی مالی اقدامات اور غیر منصفانہ تجارتی پالیسیوں کا ردعمل قرار دیا گیا ہے۔

ٹرمپ نے 10 جولائی کو کینیڈا کے وزیر اعظم مارک کارنی کو بھیجے گئے ایک سرکاری خط میں اس فیصلے کی تفصیلات بیان کیں۔ انہوں نے لکھا کہ امریکہ کینیڈا کے ساتھ تجارتی تعلقات جاری رکھنا چاہتا ہے، مگر کینیڈا نے امریکہ کی طرف سے لگائے گئے ٹیرف کے جواب میں بھی اپنے اقدامات کیے جو ناقابل قبول ہیں۔

صدر ٹرمپ نے الزام لگایا کہ امریکہ میں فینٹانائل نامی خطرناک نشہ آور دوا کا پھیلاؤ جزوی طور پر کینیڈا کی ناکامی کا نتیجہ ہے، جو اپنی سرحد سے امریکہ میں ان منشیات کی آمد کو روکنے میں ناکام رہا ہے۔ انہوں نے لکھا، ’’یہ مسئلہ ہماری قومی سلامتی کے لیے خطرہ بن چکا ہے اور ہم اب اس سے چشم پوشی نہیں کر سکتے۔‘‘

ٹرمپ نے مزید وضاحت کی کہ اگر کینیڈا یا اس کی کمپنیاں اپنی مصنوعات کسی تیسرے ملک کے ذریعے امریکہ بھیج کر نئے ٹیرف سے بچنے کی کوشش کریں گی، تو ان پر بھی یہی 35 فیصد ٹیرف نافذ ہوگا۔ ساتھ ہی انہوں نے متنبہ کیا کہ اگر کینیڈا جوابی ٹیرف لگاتا ہے، تو امریکہ اس کے برابر یا اس سے زائد شرح شامل کر کے نیا ٹیرف عائد کرے گا۔

خط میں کینیڈا کی ڈیری پالیسیوں پر بھی شدید تنقید کی گئی ہے۔ ٹرمپ نے دعویٰ کیا کہ کینیڈا امریکی ڈیری فارمرز پر 400 فیصد تک کا ٹیرف لگاتا ہے، حالانکہ امریکی فارمرز کو کینیڈا میں اپنی مصنوعات فروخت کرنے کی آزادی ہی نہیں دی جاتی۔ انہوں نے کہا، ’’یہ تجارتی خسارہ ہماری معیشت ہی نہیں بلکہ قومی سلامتی کے لیے بھی ایک بڑا خطرہ ہے۔‘‘

صدر ٹرمپ نے کینیڈین کمپنیوں کو مشورہ دیا کہ اگر وہ امریکہ میں اپنی پیداوار شروع کریں تو ان کی ہر ممکن مدد کی جائے گی۔ انہوں نے وعدہ کیا کہ امریکہ میں کاروبار شروع کرنے کی خواہشمند کمپنیوں کو تمام منظوری چند ہفتوں میں پیشہ ورانہ انداز میں فراہم کی جائے گی۔

یہ فیصلہ ایسے وقت میں آیا ہے جب امریکہ اور کینیڈا کے درمیان تجارتی کشیدگیاں بڑھتی جا رہی ہیں اور فینٹانائل کے مسئلے نے دو طرفہ تعلقات کو مزید پیچیدہ بنا دیا ہے۔