ٹرمپ مواخذے کی کارروائی میں شریک ہوں یا شکایت کرنا بند کریں، امریکی کانگریس

امریکی کانگریس کی کمیٹی نے سخت رخ اختیار کرتے ہوئے کہا ہے کہ ٹرمپ یا تو مواخذے کی کارروائی میں شرکت کریں یا پھر شکایت کرنا بند کریں۔ ڈیموکریٹک پارٹی کی ہاؤس جیوڈیشری کمیٹی کے چیئرمین جیرولڈ نیڈلر کا کہنا تھا کہ اگر صدر سماعت کے موقع پر آئیں گے تو وہ گواہوں سے سوال کرنے کے مجاز ہوں گے۔

واضح رہے امریکی صدر پر الزام ہے کہ انھوں نے یوکرین کو دی جانے والی فوجی امداد روک لی تھی تاکہ وہ یوکرین کے نو منتخب صدر کو اس بات پر مجبور کر سکیں کہ وہ سابق امریکی نائب صدر اور صدارتی امیدوار جو بائیڈن کے بیٹے کے خلاف مبینہ کرپشن کے الزامات پر تحقیقات شروع کروائیں۔

مواخدے کی کارروائی میں یہ دیکھا جا رہا ہے کہ آیا امریکی صدر نے بائیڈن کے خلاف تحقیقات نہ کرنے پر یوکرین کو امداد روکنے کی دھمکی دی تھی یا نہیں۔ دوسری جانب صدر ٹرمپ امریکہ کے ایوان نمائندگان میں صدر کے مواخذے کے لیے کی جانے والی تحقیقات کو ایک ’انتقامی کارروائی‘ قرار دیتے ہیں۔

کمیٹی کے چیئرمین نیڈلر کا کہنا تھا کہ ’مجھے امید ہے کہ وہ گذشتہ صدور کی طرح بذات خود یا وکیل کے ذریعے اس انکوائری کا حصہ بنیں گے۔‘ ان کا مزید کہنا تھا کہ ’ہم اس بات پر بھی بحث کریں گے کہ کیا ٹرمپ پر لگے الزامات کانگریس کو اس بات کی اجازت دیتے ہیں کہ وہ مواخدے کی انکوائری کا حکم دے سکے۔‘

واضح رہے کہ اگر ٹرمپ کو دو تہائی اکثریت مجرم قرار دے دیتی ہے، جو کہ انتہائی مشکل ہے، تو وہ امریکہ کے پہلے صدر ہوں گے جنھیں مواخذے کے ذریعے ہٹایا جائے گا۔