امریکہ نے وینزویلا میں ’پراسرار ہتھیار‘ کا کیا تھا استعمال! مادورو کے سیکورٹی اہلکاروں کو خون کی الٹیاں اور ناک سے نکلا خون

وینزویلا کی سرزمین پر اترکرصدر نکولس مادورو اور ان کی اہلیہ کو اغوا کر کے امریکہ لے جانے والا فوجی آپریشن بحث کا موضوع بنا ہوا ہے۔ دریں اثنا خبر ہے کہ اس آپریشن کے دوران امریکہ نے ایک ایسے طاقتور پراسرار ہتھیار کا استعمال کیا تھا جس نے وینزویلا کے فوجیوں کو گھٹنوں پر لا دیا تھا۔ ’نیویارک‘ پوسٹ کی رپورٹ کے مطابق مادورو کی سیکیورٹی میں تعینات ایک سیکیورٹی اہلکار نے انٹرویو کے دوران اس امریکی فوجی آپریشن کے بارے میں چونکا دینے والی تفصیلات بتا ئیں۔ سیکورٹی اہلکار نے بتایا کہ کس طرح مٹھی بھرامریکی فوجیوں نے مادورو کی حفاظت پر مامور سینکڑوں فوجیوں کا خاتمہ کردیا۔ امریکی فوجیوں کے پاس جدید ترین ہتھیار تھے اور حیرت انگیز طور پر ایک بھی امریکی فوجی کو کوئی نقصان نہیں پہنچا۔

سیکیورٹی اہلکار نے بتایا کہ فوجی آپریشن کے دن سب کچھ معمول پر تھا۔ ہم سیکیورٹی ڈیوٹی میں تعینات تھے لیکن اچانک ہمارے تمام ریڈار سسٹم بند ہوگئے۔ ہمیں کچھ سمجھ نہیں آیا کہ کیا ہو رہا ہے۔ تبھی ہمیں کچھ ڈرونز دکھائی دیئے، بہت سے ڈرونز ہمارے بلکل اوپر تھے۔ اس پُراسرار صورتحال سے ہم لوگوں حیران وپریشان رہ گئے۔

سیکیورٹی اہلکار نے بتایا کہ ڈرون کے بعد کچھ ہیلی کاپٹر نظر آئے۔ میرے خیال میں 8 ہیلی کاپٹر تھے۔ ان ہیلی کاپٹروں سے کچھ فوجی اترے اغ کی تعداد تقریباً 20 تھی۔ وہ انتہائی جدید ہتھیاروں سے لیس تھے۔ اس کے بعد قتل عام جیسا ماحول ہوگیا۔ ہم لوگ بڑی تعداد میں تھے لیکن ہمیں کچھ سمجھ نہیں آرہا تھا۔ وہ درست نشانے اور رفتار کے ساتھ شوٹ کر رہے تھے۔ ایسا لگ رہا تھا جیسے ان کا ہر فوجی 300 راؤنڈ فی منٹ فائر کر رہا تھا، ہم کچھ نہیں کر پائے۔

مادورو کی سیکیورٹی ٹیم کے اس رکن نے بتایا کہ امریکی فوجیوں نے اچانک کچھ لانچ کیا۔ مجھے سمجھ نہیں آرہا کہ میں اسے کیسے سمجھاؤں۔ بہت زوردار آواز آئی، ایسا لگا جیسے میرا سر پھٹ رہا ہے۔ ہم سبھی کی ناک سے خون نکلنے لگا۔ ہم میں سے کئی فوجی خون کی الٹیاں کرنے لگے۔ ہم زمین پر گر پڑے اور ہل بھی نہیں پارہے تھے۔ ان کے مٹھی بھر فوجیوں نے ہم سبھی کو قابو کرلیا۔ وہ جس طرح کی ٹیکنالوجی کا استعمال کررہے تھے، ہم اس کا مقابلہ نہیں کرپائے۔ میں نے اپنی زندگی میں اس طرح کی تکنیک نہیں دیکھی تھی۔ ہم اس فوجی پتھیار یا جو بھی وہ تھا، اس کے اثرکی وجہ سے ٹھیک سے کھڑے بھی نہیں ہوپارہے تھے۔

مادورو کے سیکورٹی اہلکار نے مزید بتایا کہ میں ان سبھی کو وارننگ دینا چاہتا ہوں، جو یہ سوچتے ہیں کہ وہ امریکہ کا مقابلہ کرپائیں گے۔ انہیں اندازہ نہیں ہے کہ امریکہ کیا کر سکتا ہے۔ میں نے اس دن جو کچھ دیکھا اس کے بعد میں ان سے مقابلہ نہیں کرپاؤں گا۔ جب ان سے پوچھا گیا کہ کیا ٹرمپ کا اگلا ہدف میکسیکوہے، اس سے کیا لاطینی امریکہ کی صورت حال بدلے گی؟ اس پر سیکورٹی اہلکار نے کہا کہ یقیناً۔ ہر کوئی اس کے بارے میں بات کر رہا ہے، ہر کوئی وہ نہیں چاہتا ہم نے برداشت کیا۔ اب ہر ملک دو بار سوچے گا۔ وینزویلا کے اس سیکیورٹی اہلکار کے آنکھوں دیکھے واقعہ کو وائٹ ہاؤس کی پریس سکریٹری کیرولین لیویٹ نے بھی سوشل میڈیا پلیٹ فارم ’ ایکس‘پر شیئر کیا۔