اسرائیل-حماس جنگ بندی برقرار رہنے پر تذبذب، ٹرمپ-نیتن یاہو ملاقات پر دنیا کی نظریں

امریکی صدر ڈونالڈ ٹرمپ نے غزہ میں اسرائیل اور حماس کے درمیان نافذ جنگ بندی کو لے کر تذبذب پیدا کر دی ہے۔ انہوں نے بنجامن نیتن یاہو سے ہونے والی میٹنگ سے قبل کہا ہے کہ یہ طے نہیں ہے کہ جنگ بندی رہے گی یا نہیں۔ انہوں نے کہا کہ میں کوئی گارنٹی نہیں دے سکتا کہ امن برقرار رہے گا۔

واضح ہو کہ وہائٹ ہاؤس میں ٹرمپ کی نیتن یاہو سے ملاقات ہونے والی ہے۔ اس پر پوری دنیا کی نظریں لگی ہیں۔ اسرائیل کا کہنا ہے کہ وہ جنگ بندی بڑھانے کو لے کر رضامند ہے لیکن حماس کو سمجھنا ہوگا۔ وہیں حماس بھی اس پر راضی ہے لیکن اس کے حامی اسے اسرائیل کی شکست کے طور پر مشتہر کر رہے ہیں، جس سے نیتن یاہو حکومت پر اسرائیل کے اندر دباؤ بن رہا ہے۔

اس درمیان ایک اہم خبر یہ بھی ہے کہ ڈونالڈ ٹرمپ ایک نئے حکم پر دستخط کرنے والے ہیں۔ اس کے تحت اقوام متحدہ کی حقوق انسانی کونسل سے امریکہ الگ ہو جائے گا۔ اس کے علاوہ فلسطینی رفیوجیوں کی مدد کرنے والے ادارے یو این آر دبلیو اے کی فنڈنگ بھی روک دینے کی تیاری ہے۔ اس پر بائیڈین انتظامیہ نے ہی روک لگا دی تھی جسے ٹرمپ آگے بڑھانے والے ہیں۔ اس طرح فلسطینیوں کی مدد میں بھی کٹوتی ہوگی اور یو این کے ادارے پر بھی اثر پڑے گا۔

دراصل حماس اور اسرائیل کے درمیان بھلے ہی جنگ بندی نافذ ہے لیکن دونوں ہی طرف سے اسے جیت کے طور پر مشتہر کرنے سے کشیدگی کی حالت بنی ہوئی ہے۔ اسرائیلی وزیر اعظم بنجامن نیتن یاہو نے ملک سے روانہ ہونے کے دوران کہا کہ ہم حماس پر جیت کو لے کر چرچا کریں گے۔