کینیا: نیروبی کے ہوٹل میں خودکش بم دھماکہ، 15 ہلاک، درجنوں زخمی

نیروبی: کینیا کے دارالحکومت نیروبی واقع ڈوسیٹ ہوٹل میں منگل کی رات ہوئے دھماکے میں کم از کم 15 افراد ہلاک اور 30 دیگر افراد زخمی ہو گئے۔ کینیا کے این ٹی وی نیوز چینل نے اس سلسلے میں بتایا کہ ہوٹل میں پھنسے ہوئے لوگوں کو چھڑانے کی مہم شروع ہونے کے تھوڑی دیر بعد ہی دھماکہ ہوا، جس میں کم از کم 15 افراد ہلاک اور 30 دیگر زخمی ہو گئے۔این ٹی وی کے مطابق صومالیہ کے جنگجو گروپ الشباب نےحملے کی ذمے داری قبول کرنے کا دعویٰ کیا ہے۔ ہلاک ہونے والوں میں 11 افراد کینیا کے ، ایک امریکی اور برطانیہ کا شہری ہے اور دو لوگوں کی ابھی تک شناخت نہیں ہو سکی ہے۔

اس درمیان کینیا کی حکومت نے کہا ہے کہ ملک میں سیکورٹی کی صورت حال اب قابو میں ہے۔ کینیا کے کابینہ سکریٹری فریڈ مٹیانگی نے صحافیوں کو بتایا سیکورٹی فورسز نے9 گھنٹے کی کارروائی کے بعد ہوٹل سے کینیا اور دیگر ممالک کے لوگوں کو باہر نکال لیا ہے۔انہوں نے کہا کہ ’’اب ہم اس علاقے کی صفائی میں مصروف ہیں اور ثبوت جمع کررہے ہیں ۔ میں یہ کہہ سکتا ہوں کہ کینیا کے تمام شہری اور غیر ملکی سیاح اب محفوظ ہیں۔‘‘ سیکورٹی اہلکاروں نے علی الصبح بدھ کو بہت سے لوگوں کو ہوٹل سے باہر نکالا۔

ذرائع کے مطابق خودکش بم دھماکے کے بعد اس کے احاطے میں کھڑی متعدد گاڑیوں کو آگ لگ گئی تھی اور وہاں موجود لوگ جانیں بچانے کے لیے ادھر ادھر پناہ کے لیے بھاگنا شروع ہوگئے تھے اور انھوں نے قریبی عمارتوں میں چھپ کر اپنی جانیں بچائیں۔ کینیا کے مقامی ٹیلی ویژن این ٹی وی نیوز چینل کے مطابق ہوٹل سے باہر آئے ایک شخص نے بتایا کہ پولس کے پہنچنے سے پہلے لوگ کئی گھنٹوں تک بیت الخلا میں چھپے رہے۔

واضح رہے کہ صومالیہ کے انتہا پسند گروپ الشباب نے 2013ء میں بھی نیروبی میں ایک ویسٹ گیٹ مال پر حملہ کیا تھا جس کے نتیجے میں 67 افراد ہلاک ہوگئے تھے۔انھوں نے قریب قریب پورا دن وہاں خریداری کے لیے آنے والے افراد اور دکان داروں کو یر غمال بنائے رکھا تھا اور اس دوران وہ دستی بموں سے دھماکے کرتے رہے تھے۔