روس-یوکرین جنگ: روسی افواج کیف سے 30 کلو میٹر دور، راجدھانی کا سقوط چند گھنٹوں میں ممکن!

کیف: روسی افواج یوکرین کے دارالحکومت کیف سے تقریبا 30 کلو میٹر کی دوری پر رہ گئی ہیں۔ یہ بات امریکی نیوز چینل سی این این نے جمعے کے روز امریکی ذرائع کے حوالے سے بتائی ہے۔ ادھر، بلومبرگ نیوز نیٹ ورک نے کہا ہے کہ یوکرین کی راجدھانی کیف کا فضائی دفاع کا نظام تقریبا تباہ ہو گیا ہے جس کے بعد راجدھانی چند گھنٹوں کے اندر روسی فوج کے قبضے میں جا سکتی ہے۔

ادھر، اخباری ویب سائٹوں کے مطابق یوکرین کی فوج نے آج علی الصباح ایک پل کو دھماکے سے اڑا دیا تا کہ روسی فوج کے ٹینکوں کو کیف کی سمت پیش قدمی سے روکا جا سکے۔ یوکرین کی فوج نے مزید بتایا کہ دارالحکومت کی جانب بڑھنے والی روسی فوج کے ساتھ جھڑپیں جاری ہیں۔

یوکرین کے وزیر خارجہ نے کیف پر روس کے خوف ناک میزائل حملے کی مذمت کی ہے۔ انہوں نے باور کرایا کہ 1941 میں نازیوں کے حملے کے بعد سے کیف میں اس طرح کی صورت حال نہیں دیکھی گئی۔

اس سے پہلے امریکی حکام نے نیوز ویک کو بتایا تھا کہ انہیں توقع ہے کہ یوکرین کا دارالحکومت کیف چند دنوں میں آنے والی روسی افواج کے قبضے میں آجائے گا اور اس کے فوراً بعد ملک کی مزاحمت کو مؤثر طریقے سے بے اثر کر دیا جائے گا۔

ان اہلکاروں نے نام ظاہر نہ کرنے کی شرط پر بتایا کہ ماسکو کی توجہ جیسا کہ روسی صدر ولادیمیر پوتین کہہ چکے ہیں یوکرین کی افواج کو گھیرے میں لے کر انہیں ہتھیار ڈالنے یا انہیں تباہ کرنے پر مجبور کرنا ہو گا۔ انہوں نے توقع ظاہر کی 96 گھنٹوں کے اندر کیف پر قبضہ کر لیا جائے گا، اور یوکرین کی قیادت تقریباً ایک ہفتے میں گر جائے گی۔