رانیل وکرما سنگھے سری لنکا کے نئے صدر منتخب، کہا- ’آگے بڑے چیلنجز کا سامنا کرنا ہوگا‘

سری لنکا کی پارلیمنٹ نے بدھ کے روز صدر گوٹابایا راجا پکشے کی جگہ قائم مقام صدر رانیل وکرما سنگھے کو نیا صدر منتخب کر لیا۔

سری لنکا کے نو منتخب صدر رانیل وکرماسنگھے / تصویر ٹوئٹر
سری لنکا کے نو منتخب صدر رانیل وکرماسنگھے / تصویر ٹوئٹر
user

قومی آوازبیورو

کولمبو: معاشی اور سیاسی عدم استحکام سے گزر رہے سری لنکا کو نیا صدر مل گیا ہے۔ سری لنکا کی پارلیمنٹ نے بدھ کے روز صدر گوٹابایا راجا پکشے کی جگہ قائم مقام صدر رانیل وکرما سنگھے کو نیا صدر منتخب کر لیا۔ نومنتخب صدر نے کہا کہ ملک انتہائی مشکل وقت سے گزر رہا ہے اور عوام کو بڑے چیلنجز کا سامنا کرنا پڑ رہا ہے۔

خیال رہے کہ سخت عوامی احتجاج کے درمیان گوٹابایا راجا پکشے ملک سے فرار ہو گئے تھے اور انہوں نے ای میل کے ذریعے اسپیکر آبے وردنا کو اپنا استعفیٰ بھیجا تھا۔ سری لنکا میں صدر کے انتخاب کے لئے آج پارلیمنٹ کا خصوصی اجلاس طلب کیا گیا تھا۔ پارلیمنٹ کے 225 ارکان میں سے 2 نے خفیہ طور پر ووٹ دیا۔ وکرما سنگھے کو 134 ووٹ ملے جبکہ دلاس الہپرما کو صرف 82 ووٹ حاصل ہوئے۔ جے وی پی لیڈر ارونا کمارا دسانائیکے کو صرف 3 ووٹ ہی مل سکے۔


خیال رہے کہ راجاپکشے کے ملک سے فرار ہونے کے بعد گزشتہ ہفتے وزیر اعظم رانیل وکرما سنگھے نے ملک کے کارگزار صدر کے طور پر حلف اٹھایا تھا۔ اس کے بعد ملک کی پارلیمنٹ نے نئے صدر کے انتخاب کے لیے عمل شروع کیا۔ راجاپکشے پہلے مالدیپ اور پھر وہاں سے سنگاپور فرار ہو گئے تھے۔

گوٹابایا راجاپکشے سری لنکا سے اس وقت فرار ہوئے، جب ہزاروں مظاہرین نے دارالحکومت کولمبو میں صدارتی محل پر دھاوا بول دیا اور وزیر اعظم کے گھر کو آگ لگا دی۔ سری لنکا کے عوام اس بحران کا ذمہ دار صدر گوٹابایا راجا پکشے کے سیاسی خاندان کو ٹھہراتے ہیں۔ گوٹابایا راجاپکشے کے بھائی مہندا راجاپکشے نے مئی میں وزیر اعظم کے عہدے سے استعفیٰ دے دیا تھا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔