پاکستانی حکومت میں گھبراہٹ، صدر زرداری نے قومی اسمبلی کا ہنگامی اجلاس کیا طلب

جموں و کشمیر کے پہلگام میں ہوئے دہشت گردانہ حملے کے بعد ہندوستان اور پاکستان کے درمیان کشیدگی روزانہ بڑھتی جا رہی ہے۔ اس درمیان پاکستانی صدر آصف علی زرداری نے ہفتہ کو دیر رات ایک بڑا فیصلہ کرتے ہوئے پیر کی شام 5 بجے نیشنل اسمبلی (پارلیمنٹ) کا ہنگامی اجلاس طلب کیا ہے۔

پاکستانی حکومت کی طرف سے جاری سرکاری بیان کے مطابق، ’’اسلامک ریپبلک آف پاکستان کے آئین کی آرٹیکل 54 کے سیکشن (1) کے ذریعہ فراہم طاقت کا استعمال کرتے ہوئے، صدر نے اسمبلی عمارت، اسلام آباد میں پیر، 5 مئی کو شام 5 بجے قومی اسمبلی کی میٹنگ بلائی ہے۔‘‘

رپورٹس کے مطابق آئندہ اجلاس میں خاص طور سے پاکستان اور ہندوستان کے درمیان خراب ہوتے سفارتی تعلقات پر توجہ مرکوز کی جائے گی، جس میں سندھو آبی معاہدہ (آئی ڈبلیو ٹی) کو معطل کرنے کے ہندوستان کے حالیہ فیصلے پر خاص زور دیا جائے گا۔ پاکستانی میڈیا کے مطابق پاکستان کی حکومت ہندوستان کی کارروائی کے خلاف قومی اسمبلی میں قرار داد پیش کرنے کی تیاری میں ہے۔

یہ میٹنگ ایسے وقت میں ہو رہی ہے جب ہندوستان نے دہشت گردوں کو حمایت دینے کے لیے پاکستان پر پھر سے سخت الزامات لگائے ہیں اور ان کے خلاف کارروائی کا انتباہ دیا ہے۔

واضح رہے کہ پہلگام دہشت گردانہ حملے میں 25 سیاح سمیت 26 لوگوں کی موت ہو گئی تھی۔ بتایا جاتا ہے کہ اس حملے کو انجام دینے والے دو دہشت گرد پاکستان سے آئے تھے۔ حکومت ہند نے اس حملے کو ’’جنگ کا براہ راست عمل‘‘ بتاتے ہوئے اسے ناقابل برداشت قرار دیا ہے۔

ہندوستان کی سخت کارروائی کے انتباہ سے پاکستان میں کھلبلی مچ گئی ہے اور وہاں مسلسل میٹنگوں کا دور جاری ہے۔ پاکستانی پارلیمنٹ کا خصوصی اجلاس بلایا جانا اس طرف اشارہ کرتا ہے کہ ہندوستان کی کارروائی کے خوف سے پاکستانی حکومت پر سکتہ طاری ہے۔