شمالی کوریا نے پھردکھائی فوجی طاقت! کروز میزائل کا تجربہ، جوہری آبدوز پربھی کام جاری

 شمالی کوریا کے سربراہ کم جونگ اُن نے ایک بار پھر اپنی فوجی طاقت کا مظاہرہ کرتے ہوئے طویل فاصلے تک مار کرنے والے اسٹریٹجک کروز میزائلوں کا تجربہ کیا اور اس کا معائنہ کرکے ملک کے سائنسدانوں کا حوصلہ بڑھایا۔ اتوار کو کئے گئے اس تجربے میں میزائلوں نے جزیرہ نما کوریا کے مغرب میں سمندر کے اوپر سے پرواز کی اور اپنے اہداف کو درست طریقے سے نشانہ بنایا۔ کےسی این اے کے مطابق کم جونگ ان میزائلوں کی پرواز اور اہداف پر درست طریقے سے لگنے سےمطمئن نظر آئے۔ انہوں نے کہا کہ ملک کی جوہری صلاحیت اور اس کی تیز کارروائی کی باقاعدہ جانچ’’ذمہ دارانہ مشق‘‘ ہے، خاص طور پر جب ملک کو ’مختلف سیکورٹی خطرات‘‘ کا سامنا کرنا پڑرہا ہو۔

کم نے اس بات کا اعادہ کیا کہ پیانگ یانگ ’ریاستی ایٹمیح جنگ طاقت کے لامحدود اور بلا تعطل ترقی‘ کے لیے تمام کوششیں جاری رکھے گا۔ یہ بیان ایسے وقت سامنے آیا ہے جب شمالی کوریا 2026 کے اوائل میں ہونے والی اہم پارٹی کانگریس کی تیاری کر رہا ہے، جو اگلے 5 سالوں کے لیے ملک کے ترقیاتی منصوبے کا تعین کرے گی۔ کے سی این اے نے یہ واضح نہیں کیا کہ میزائل کہاں سے فائر کیے گئے۔ جنوبی کوریا کی خبر رساں ایجنسی یونہاپ نے اطلاع دی ہے کہ جنوبی کوریا کی فوج نے اتوار کی صبح پیانگ یانگ کے قریب سنان کے علاقے سے کئی میزائل تجربات کا پتہ لگایا۔ جنوبی کوریا کے فوجی حکام نے خبردار کیا ہے کہ شمالی کوریا اس سال کے آخر تک مزید میزائل تجربات کر سکتا ہے۔

کے سی این اے نے یہ بھی اطلاع دی کہ کم جونگ ان نے تیاری کے مرحلے میں 8,700 ٹن جوہری طاقت سے چلنے والی اسٹریٹجک گائیڈڈ میزائل آبدوز کا معائنہ کیا۔ انہوں نے جنوبی کوریا کی جانب سے جوہری آبدوز بنانے کے منصوبے کو شمالی کوریا کی سلامتی کے لیے خطرہ قرار دیتے ہوئے کہا کہ اس کا جواب دینا ضروری ہے۔ یاد رہے کہ 2019 میں امریکہ کے ساتھ جوہری مذاکرات کی ناکامی کے بعد سے شمالی کوریا خود کو ایک ’ناقابل تبدیلی جوہری طاقت‘ مانتا رہا ہے اور وہ لگاتار میزائل اور فوجی صلاحیتوں کا مظاہرہ کر رہا ہے۔