مودی کی یوکرین کے صدر سے فون پر گفتگو ، امن بحالی پر زور

صدر زیلنسکی نے اقوام متحدہ کی سلامتی کونسل میں روس کے خلاف ہندوستان کی سیاسی حمایت مانگی۔ انہوں نے کہا کہ یوکرین پر حملے کو مل کر روکنا چاہیے۔

فائل تصویر آئی اے این ایس
فائل تصویر آئی اے این ایس
user

یو این آئی

وزیر اعظم نریندر مودی نے ہفتے کو یوکرین کے صدر ولادیمیر زیلنسکی سے فون پر بات کی اور وہاں جاری جنگ کی وجہ سے ہونے والے جانی و مالی نقصان پر شدید رنج و الم کا اظہار کیا۔ صدر زیلنسکی نے مسٹر مودی کو یوکرین پر روسی افواج کے حملے سے پیدا شدہ صورتحال کی تفصیلی معلومات دی۔

وزیر اعظم کے دفتر(پی ایم او) کی ایک پریس ریلیز میں کہا گیا ہے،’وزیر اعظم نریندر مودی نے آج یوکرین کے صدر ولادیمیر زیلنسکی سے بات چیت کی‘۔ بیان میں کہا گیا ہے کہ صدر زیلنسکی نے مسٹر مودی کو یوکرین میں جاری لڑائی سے پیدا ہونے والی صورتحال سے آگاہ کیا۔


بیان میں کہا گیا ہے کہ مسٹر مودی نے وہاں جنگ میں جانی اور مالی نقصان پر گہرے دکھ کا اظہار کیا۔ مسٹر مودی نے تشدد کو فوری طور پر ختم کرنے اور بات چیت کی فوری بحالی کے اپنے مطالبے کو دہرایا‘۔ مسٹر مودی نے صدر زیلنسکی سے کہا کہ ہندوستان امن کی کوششوں میں جو کچھ بھی کر سکتا ہے‘ اس کے لیے تیار ہے۔

دریں اثنا، یوکرین کے صدر نے اپنے ٹویٹر اکاؤنٹ پر مسٹر مودی کے ساتھ فون پر بات چیت کی تفصیلات بتاتے ہوئے اقوام متحدہ کی سلامتی کونسل (یو این ایس سی) میں روس کے خلاف ہندوستان کی سیاسی حمایت مانگی۔ انہوں نے کہا کہ یوکرین پر حملے کو مل کر روکنا چاہیے۔


مسٹر زیلنسکی نے مسٹر مودی کو اپنے ملک کی صورتحال کے بارے میں بتایا کہ ایک لاکھ سے زائد حملہ آور یوکرین کی سرزمین میں داخل ہو چکے ہیں اور عمارتوں پر گھات لگا کر حملہ کر رہے ہیں۔ مسٹر زیلنسکی نے مسٹر مودی سے یوکرین پر روس کے حملے کو مشترکہ طور پر رکوانےکی اپیل کی ہے۔

انہوں نے ٹویٹ میں کہا، ’وزیر اعظم نریندر مودی سے بات کی۔ حملے کو ناکام کرنے کی تدبیر کی اطلاع دی ۔ ایک لاکھ سے زیادہ حملہ آور ہماری سرزمین میں داخل ہو چکے ہیں۔ وہ گھات لگا کر عمارتوں پر حملہ کر رہے ہیں۔ اقوام متحدہ کی سلامتی کونسل میں سیاسی حمایت کی درخواست ہے۔ آئیے مل کر حملے کو روکیں‘۔


مسٹر مودی نے جمعرات کو حملہ شروع ہونے کے بعد روس کے صدر ولادیمیر پوتن سے بات چیت کی تھی اور نیٹو اور روس کے درمیان بات چیت کے ذریعے اعتماد بحالی پر زور دیا تھا۔

صدر پوتن نے کل یوکرین کی فوج سے اپیل کی تھی کہ وہ اپنے نیو نازی پرست رہنماؤں کو اکھاڑ پھینکیں۔ مسٹر پوتن نے یہ بھی الزام لگایا کہ یوکرین کے قوم پرست عناصر بڑے شہروں کے رہائشی علاقوں میں ہتھیار نصب کر رہے ہیں اوروہ ایسا کرکے روسی افواج مشتعل کر رہے ہیں۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔