’پتہ تھا کچھ ہونے والا ہے‘، پاکستان پر ہندوستان کی کارروائی پر امریکی صدر کا ردعمل

پہلگام حملے کے جواب میں ہندوستان نے پاکستان کے کئی ٹھکانوں پر حملہ کیا ہے، جس میں دہشت گردوں کے کئی ٹھکانوں کو تباہ کر دیا گیا۔ ہندوستان کی اس کارروائی پر ردعمل ظاہر کرتے ہوئے امریکی صدر ڈونالڈ ٹرمپ نے کہا کہ لوگوں کو پہلے سے ہی پتہ تھا کہ کچھ ہونے والا ہے۔

ایک پریس کانفرنس کے دوران ٹرمپ نے کہا، ’’ہم نے اس کے بارے میں تب سنا جب ہم اوول کے دروازے سے اندر جا رہے تھے۔ میرا خیال ہے کہ ماضی کے کچھ واقعات کو دیکھتے ہوئے لوگوں کو اندازہ تھا کہ کچھ ہونے والا ہے۔ وہ ایک طویل عرصے سے لڑ رہے ہیں — کئی دہائیوں سے۔ بلکہ اگر غور کریں تو صدیوں سے لڑ رہے ہیں۔ مجھے امید ہے کہ یہ بہت جلدی ختم ہو جائے گا۔‘‘

وہیں، امریکی محکمۂ خارجہ کے ترجمان نے ہندوستانی فوج کے ’آپریشن سندور‘ پر ردِعمل دیتے ہوئے کہا، ’’ہم نے اس سے متعلق رپورٹس دیکھی ہیں، تاہم فی الحال ہمارے پاس اس کی مکمل تفصیلات نہیں ہیں۔ یہ ایک ابھرتی ہوئی صورتحال ہے اور ہم اس پر قریبی نظر رکھے ہوئے ہیں۔‘‘

دریں اثنا، وزارت دفاع نے ہندوستانی فوج کی کارروائی پر کہا کہ 26 بے قصور لوگوں کی موت کے بدلے ہندوستان نے ’آپریشن سندور‘ شروع کیا ہے جو وحشیانہ پہلگام حملے کا ایک صحیح جواب ہے۔

واضح رہے کہ ’آپریشن سندور‘ کے تحت ہندوستانی فضائیہ نے بہاول پور، مریدکے، باگھ، کوٹلی، مظفر آباد، سیالکوٹ، گلپور، بھمبر اور چک امرو میں دہشت گردوں کے ٹھکانوں کو تباہ کر دیا۔ ذرائع کے مطابق برہموس میزائل اور رافیل طیاروں کا استعمال کرکے ان ٹھکانوں پر عین مطابق حملے کیے گئے۔ ہندوستانی فوج نے دعویٰ کیا ہے کہ ان حملوں میں 42 دہشت گردوں کے لانچ پیڈس میں سے 9  کو پوری طرح سے تباہ کر دیا گیا ہے۔