اہم خفیہ فائلیں چین کو دینے کے الزام میں قومی سلامتی کے ماہر ایشلے ٹیلس امریکہ میں گرفتار

 امریکہ میں ایک سنسنی خیز واقعہ میں مشہور ہند نژاد قومی سلامتی کے ماہر ایشلے ٹیلس کو خفیہ دستاویزات رکھنے اور چین سے روابط کے الزام میں گرفتار کیا گیا ہے۔ اس دوران فیڈرل بیورو آف انویسٹی گیشن (ایف بی آئی) نے ہفتے کے روز ورجینیا کے شہر ویانا میں ان کے گھر پر چھاپہ مار کر 1,000 صفحات پر مشتمل انتہائی خفیہ دستاویزات قبضے میں لینے کا دعویٰ کیا ہے۔

ایف بی آئی نے الزام لگایا ہے کہ ٹیلس کے پاس غیر قانونی طور پر امریکی قومی سلامتی سے متعلق خفیہ دفاعی دستاویزات تھیں اور وہ گزشتہ چند سالوں میں کئی بار چینی حکام سے ملاقاتیں کر چکے ہیں۔ ایف بی آئی کی طرف سے داخل کردہ حلف نامے کے مطابق ٹیلس کے گھر کے بیسمنٹ واقع دفتر میں بند کیبنٹ، ڈیسک اور بیگس میں چھپائے گئے ہزاروں دساویزات ملے جن میں کئی پر ’ ٹاپ سیکریٹ‘ اور ’سیکریٹ‘ کی مہر لگی ہوئی تھی۔

امریکی تفتیشی ایجنسی نے دعویٰ کیا ہے کہ تحقیقات سے یہ بات سامنے آئی  ہے کہ 25 ستمبر کو ٹیلیس کو امریکی محکمہ خارجہ کے کمپیوٹر سسٹم سے سیکڑوں خفیہ دستاویزات کی پرنٹنگ کرتے ہوئے کیمرے میں قید کیا گیا تھا۔ انہثوں نے یوایس ایئرفورس ٹیکٹکس نامی 1,288 صفحات پر مشتمل فائل کو ’ایکون ریفارم‘ نام سے محفوظ کیا اور کچھ پیج پرنٹ کرنے کے بعد فائل ڈیلیٹ کردی۔ 10 اکتوبر کو ایک اور سیکیورٹی کیمرے نے ٹیلس کو اسکندریہ، ورجینیا میں سرکاری سہولت سے اپنے بیگ میں چھپاکردستاویزات  لے جاتے ہوئے دیکھا گیا۔

ٹیلس اس سے قبل امریکی صدر جارج ڈبلیو بش کے معاون خصوصی اور نیشنل سیکیورٹی کونسل (این ایس سی) میں اسٹریٹجک پلاننگ اور جنوبی ایشیا کے ڈائریکٹر کے طور پر خدمات انجام دے چکے ہیں۔ وہ فی الحال محکمہ دفاع کے کنٹریکٹر اور کارنیگی اینڈومنٹ فار انٹرنیشنل پیس میں سینئر فیلو کے طور پر کام کر رہے تھے۔ ایف بی آئی کے مطابق ٹیلس 11 اکتوبر کی شام کو اپنے اہل خانہ کے ساتھ روم جانے کی تیاری کر رہے تھے لیکن ان کی پرواز سے قبل ان کے گھر پر چھاپہ مارا گیا اور انہیں گرفتار کر لیا گیا۔ ان کے پاس سے برآمد ہونے والے دستاویزات کی تفتیش جاری ہے۔