امریکہ میں 12 دنوں کے اندر چوتھا فضائی حادثہ، ایریزونا ایئرپورٹ پر دو طیارے ٹکرا گئے، ایک شخص ہلاک

واشنگٹن: امریکہ میں فضائی حادثات کا سلسلہ جاری ہے۔ تازہ واقعہ ایریزونا کے اسکاٹسڈیل ایئرپورٹ پر پیش آیا، جہاں ایک نجی جیٹ طیارہ رن وے پر کھڑے طیارے سے ٹکرا گیا، جس کے نتیجے میں ایک شخص ہلاک اور کئی زخمی ہو گئے۔

اسکاٹسڈیل ایئرپورٹ کی فضائی منصوبہ بندی اور رابطہ کار کیلی کیوسٹر کے مطابق، حادثہ اس وقت پیش آیا جب ایک درمیانے سائز کے کاروباری طیارے نے ایک اور کھڑے ہوئے طیارے کو ٹکر مار دی۔ ان کا کہنا تھا کہ ایسا محسوس ہوتا ہے کہ آنے والے جیٹ کا پرائمری لینڈنگ گیئر کام نہیں کر رہا تھا، جس کی وجہ سے وہ قابو کھو بیٹھا اور کھڑے ہوئے گلف اسٹریم 200 طیارے سے جا ٹکرایا۔

کیوسٹر کے مطابق، متاثرہ جیٹ طیارہ ٹیکساس سے آیا تھا، جس میں چار افراد سوار تھے، جبکہ پارک شدہ طیارے میں ایک شخص موجود تھا۔ حادثے کے فوراً بعد ایئرپورٹ کے رن وے کو بند کر دیا گیا۔

اسکاٹسڈیل فائر ڈیپارٹمنٹ کے کیپٹن ڈیو فالیو کے مطابق، حادثے میں زخمی ہونے والے دو افراد کو قریبی ٹراما سینٹر منتقل کیا گیا، جن میں سے ایک کی حالت مستحکم بتائی جا رہی ہے۔ انہوں نے مزید کہا کہ حکام ہلاک ہونے والے فرد کی لاش برآمد کرنے میں مصروف ہیں۔

امریکہ میں حالیہ دنوں میں متعدد فضائی حادثات رونما ہو چکے ہیں:

۔ 3 فروری کو ہسٹن سے نیویارک جانے والی یونائیٹڈ ایئرلائنز کی ایک پرواز کے انجن میں آگ لگ گئی، جس کے بعد پرواز کو فوری طور پر خالی کروانا پڑا۔

۔ یکم فروری کو فلڈیلفیا میں روزویلٹ مال کے قریب لیر جیٹ 55 طیارہ گر کر تباہ ہو گیا۔ یہ طیارہ اسپرنگ فیلڈ برینسن نیشنل ایئرپورٹ جا رہا تھا۔

۔ 30 جنوری کو واشنگٹن ڈی سی میں ریگن نیشنل ایئرپورٹ کے قریب ایک امریکی ایئرلائنز کے طیارے اور ہیلی کاپٹر کے درمیان زبردست تصادم ہوا، جس کے نتیجے میں دونوں فضا سے گر کر دریا میں جا گرے اور حادثے میں تمام 67 افراد ہلاک ہو گئے۔

یہ مسلسل بڑھتے ہوئے فضائی حادثات امریکی فضائی تحفظ پر سوالیہ نشان کھڑے کر رہے ہیں، جبکہ ماہرین ان واقعات کی وجوہات جاننے کے لیے تحقیقات میں مصروف ہیں۔