کانگو کشتی حادثے میں مرنے والوں کی تعداد 150 ہوئی، 500 مسافروں میں سے کئی افراد ابھی بھی لاپتہ

 ڈیموکریٹک ریپبلک آف کانگو میں موٹر سے چلنے والی  لکڑی کی ایک کشتی میں آگ لگنے کے بعد ہوئے حادثے میں مرنے والوں کی تعداد بڑھ کر 150 ہو گئی ہے۔ حادثے کے وقت کشتی میں 500 مسافر سوار تھے جن میں کافی تعداد میں خواتین اور بچے بھی شامل تھے۔ مقامی افسروں کے مطابق یہ واقعہ منگل کو کانگو ندی میں اس وقت پیش آیا جب ایک خاتون کھانا بنا رہی تھی اور اچانک آگ لگ گئی۔ یہ کشتی مٹن کومو بندرگاہ سے بولومبا علاقے کے لیے روانہ ہوا تھا۔

کانگو میں پرانے لکڑی کے جہازوں کا استعمال گاؤں کے درمیان اہم ٹرانسپورٹیشن کے طور پر ہوتا ہے لیکن ان کے تحفظاتی طریقے بہت ہی کمزور ہوتے ہیں۔ حادثہ کے بعد ابھی بھی کئی لوگ لاپتہ ہیں اور راحت اور بچاؤ کام جاری ہے۔ مقامی انتظامیہ کے مطابق سینکڑوں لوگ ابھی بھی لاپتہ ہیں۔ پہلے مہلوکین کی تعداد 50 بتائی گئی تھی لیکن بعد میں یہ تعداد بڑھ کر 150 تک پہنچ گئی ہے۔ ایچ بی کونگولو نام کی یہ کشتی مٹن کومو بندرگاہ سے روانہ ہوکر بولمبو علاقے جا رہی تھی۔

بتایا جاتا ہے کہ تقریباً 100 لوگوں کو زندہ بچا لیا گیا ہے۔ انہیں مقامی ٹاؤن ہال میں عارضی پناہ گاہ میں رکھا گیا ہے۔ وہیں آگ میں جھلسے لوگوں کو آس پاس کے اسپتالوں میں بھرتی کرایا گیا ہے۔ ریور کمشنر کامپیٹنٹ لویوکو نے بتایا کہ جب آگ لگی تو کئی مسافروں نے گھبرا کر ندی میں چھلانگ لگا دی۔ لیکن تیرنے میں اہل نہیں ہونے کی وجہ سے خواتین اور بچے گہرے پانی میں ڈوب گئے جس سے اموات کی تعداد اور بڑھ گئی۔

واضح رہے کہ کانگو میں اس طرح کے واقعات مسلسل ہوتے رہتے ہیں۔ یہاں ہر سال سینکڑوں لوگ ان کشتی حادثوں میں اپنی جان گنوا دیتے ہیں۔ اکثر ان کشتیوں میں صلاحیت سے زیادہ سامان بھرا ہوتا ہے، اس وجہ سے یہاں کشتی حادثات کافی زیادہ ہوتی ہیں۔