کورونا بحران: امریکہ کا کورونا ٹیکہ لگوا چکے افراد کے لئے سفری پابندیاں ہٹانے کا فیصلہ

واشنگٹن: امریکہ نے نومبر سے ویکسین شدہ افراد پر سے تمام سفری پابندیاں ہٹانے کا فیصلہ کیا ہے۔ وائٹ ہاؤس کے عہدیدار نے کہا ہے کہ مکمل ویکسین والے مسافر نومبر سے امریکہ کا سفر کر سکیں گے۔ عہدیدار کا کہنا ہے کہ امریکہ گزشتہ سال سے سفری پابندی کے شکار ملکوں سے غیر امریکی شہریوں کو امریکہ آنے کی اجازت دینے کا ارادہ رکھتا ہے۔

دریں اثنا برطانیہ کے وزیر ٹرانسپورٹ گرانٹ شاپس نے ایک ٹوئٹ میں کہا کہ ’’ہمارے یو کے/ یو ایس ورکنگ گروپ کے تعاون سے نومبر سے ٹرانس اٹلانٹک پروازیں دوبارہ شروع کی جائیں گی۔‘‘ قبل ازیں، برطانوی وزیراعظم بورس جانسن نے اعلان کیا تھا کہ امریکہ نے برطانوی شہریوں کو جنہوں نے کورونا ویکسین کی مکمل خوراکیں لی ہیں، نومبر سے سفر کرنے کی اجازت دینے کا فیصلہ کیا ہے۔

گرانٹ شاپس نے یہ بھی کہا ہے کہ امریکہ برطانیہ سے آنے والے مسافروں کے لیے سفری پابندیوں میں نرمی کے لیے تیار ہے۔ اب تک برطانیہ میں تقریبا ساڑھے چار کروڑ افراد کو کوڈ ویکسین کی دونوں خوراکیں دی جا چکی ہیں۔