بمسٹیک سربراہی اجلاس: وزیر اعظم مودی نے علاقائی تعاون کے عزم کا اعادہ کیا

بینکاک: وزیر اعظم نریندر مودی نے جمعہ کے روز تھائی لینڈ کے دارالحکومت بینکاک میں منعقدہ چھٹے بمسٹیک سربراہی اجلاس میں شرکت کی اور رکن ممالک کے ساتھ مختلف شعبوں میں تعاون کو مضبوط کرنے کے عزم کا اظہار کیا۔

بنگال کی خلیج میں علاقائی ترقی کے لیے بنائی گئی تنظیم 'بنگال انیشی ایٹو فار ملٹی سیکٹورل ٹیکنیکل اینڈ اکنامک کوآپریشن' (بمسٹیک) میں ہندوستان، بنگلہ دیش، میانمار، نیپال، سری لنکا، تھائی لینڈ اور بھوٹان شامل ہیں۔ اس اجلاس کا مقصد ان ممالک کے درمیان اقتصادی و تکنیکی شراکت داری کو مزید فروغ دینا ہے۔

وزیر اعظم مودی کا تھائی لینڈ کے وزیر اعظم پیٹونگٹارن شیناواترا نے استقبال کیا۔ اس موقع پر نیپال کے وزیر اعظم کے پی شرما اولی، بھوٹان کے وزیر اعظم شیرنگ توبگے، سری لنکا کی وزیر اعظم ہارینی امرسوریا، بنگلہ دیشی عبوری حکومت کے مشیر محمد یونس اور میانمار کے فوجی سربراہ سینئر جنرل من آنگ ہلائنگ بھی موجود تھے۔

وزیر اعظم مودی نے سوشل میڈیا پلیٹ فارم 'ایکس' پر لکھا، ’’بینکاک میں بمسٹیک اجلاس کے دوران دیگر رہنماؤں سے ملاقات ہوئی۔ ہم علاقائی ترقی کے لیے اپنی وابستگی کا اعادہ کرتے ہیں۔ ہماری کوششوں سے عوام کی زندگی میں مثبت تبدیلی آئے، یہی میری خواہش ہے۔‘‘

وزیر اعظم مودی نے میانمار کے فوجی سربراہ سینئر جنرل من آنگ ہلائنگ سے بھی ملاقات کی، جس میں حالیہ زلزلے سے پیدا شدہ بحران اور بھارت کی جانب سے فراہم کی جانے والی امداد پر تبادلہ خیال کیا گیا۔

انہوں نے ایک اور پوسٹ میں کہا، "میانمار میں حالیہ زلزلے کے نتیجے میں جان و مال کے نقصان پر دلی تعزیت پیش کرتا ہوں۔ بھارت میانمار کے عوام کی مدد کے لیے ہر ممکن کوشش کر رہا ہے۔"

میانمار میں حالیہ دنوں میں 7.7 شدت کا زلزلہ آیا، جس میں 3,000 سے زائد افراد ہلاک ہوئے۔ بھارت نے 'آپریشن برہما' کے تحت انسانی امداد روانہ کی ہے، جس میں طبی امداد، خوراک اور دیگر ضروری سامان شامل ہے۔