ارجنٹائن میں ’زہریلی کوکین‘ سے 23 افراد ہلاک، 84 اسپتال میں داخل

بیونس آئرس: ہندوستان میں اکثر زہریلی شراب کے استعمال سے ہلاکتیں ہوتی ہیں مگر اس بار جنوبی امریکہ کے ملک ارجنٹائن میں زہریلی کوکین کے استعمال سے 20 سے زیادہ افراد کے ہلاک ہونے کی اطلاع موصول ہوئی ہے۔ یہاں کے بیونس آئرس میں زہریلی کوکین کے استعمال سے اب تک 23 افراد لقمہ اجل بن چکے ہیں، جبکہ 80 سے زیادہ افراد اسپتالوں میں زیر علاج ہیں۔

ٹی این میڈیا نے جمعرات کو دیر گئے اطلاع دی کہ وزارت صحت نے ملک میں زہریلی اشیا کے نئے کیسز کی نگرانی کے لیے ایک خصوصی کمیٹی تشکیل دی ہے۔ ماہرین، کوکین میں ملاوٹ والے مادے کا سراغ لگانے کی کوشش کر رہے ہیں۔ حکام کو شبہ ہے کہ یہ چوہے کا زہر ہو سکتا ہے۔

گذشتہ 24 گھنٹوں کے اندر کوکین خریدی ہے والے افراد سے بیونس آئرس کے وزیر دفاع سرجیو برنی نے اپیل کی ہے کہ وہ اسے پھینک دیں۔ عہدیداران اب اس تفتیش میں مصروف ہیں کہ یہ زہریلی کوکون کہاں سے فروخت کی گئی تھی، تاکہ اسے روکا جا سکے۔ اسی سلسلہ میں پولیس کے ٹریس ڈی فربریرو نامی علاقہ میں چھاپہ ماری کرتے ہوئے 10 مشتبہ افراد کو حراست میں لیا ہے۔

یہاں ایک گھر پر چھاپہ ماری کے دوران پولیس کو کوکین کے ایسے ہی پیکٹ برآمد ہوئے ہیں، جو متاثرین کے اہل خانہ کو ملے تھے۔ پولیس کو شبہ ہے کہ کوکین یہاں سے فروخت کی جاتی تھی۔ چھاپے کے دوران یہاں کے مقامی لوگوں کے ساتھ پولیس کی جھڑپ بھی ہوئی۔ ان پیکٹوں کو لا پلاتا کی لیبارٹری میں جانچ کے لیے بھیج دیا گیا ہے۔

(یو این آئی ان پٹ کے ساتھ)