اٹلی کے میلان سے دہلی آنے والی ایئر انڈیا کی پرواز منسوخ، دیوالی سے قبل سینکڑوں مسافر پھنسے

 دیوالی کے موقع پر وطن آنے کے لئے سینکڑوں ہندوستانیوں کو اس وقت بڑی پریشانی کا سامنا کرنا پڑا جب اٹلی کے میلان سے دہلی آنے والی ایئر انڈیا کی پرواز منسوخ کر دی گئی ، جس کی وجہ سے دیوالی سے عین قبل سینکڑوں مسافر اٹلی میں پھنس گئے۔ اس سلسلے میں ایئر لائن نے کہا کہ منسوخی تکنیکی مسئلے کی وجہ سے ہوئی اور یہ فیصلہ مسافروں کی حفاظت کو مد نظر رکھتے ہوئے کیا گیا ہے۔

معلوم ہوکہ 17 اکتوبر کو ایئرانڈیا کی پرواز AI-138 میلان سے دہلی کے لیے پرواز کرنے والی تھی، لیکن یہ پرواز نہیں بھر سکی۔ اس دوران ایئر انڈیا نے کہا کہ تمام متاثرہ مسافروں کو ہوٹل میں رہائش فراہم کی گئی حالانکہ محدود دستیابی کی وجہ سے کچھ مسافروں کو ہوائی اڈے کے باہر ٹھہرایا گیا۔

ہندوستان کی سب سے بڑی فضائی کمپنی ایئر انڈیا اور پارٹنر ایئر لائنز کے پاس سیٹ کی دستیابی کی بنیاد پر مسافروں کے لئے 20 اکتوبر سے دوبارہ بکنگ شروع کی جارہی ہے حالانکہ ایک معاملہ ایسا بھی ہے جس میں ایک مسافر کا شینگن کا ویزہ 20 اکتوبر کو ختم ہورہا ہے، اس کو ویزہ کے اصولوں کی تعمیل یقینی بنانے کے لئے آج (19 اکتوبر) کو میلان سے روانہ ہونے والی کسی دوسری ایئر لائن کی پرواز میں جگہ دی گئی۔

اس سلسلے میں ایئر انڈیا نے کہا ہے کہ وہ متاثرہ مسافروں کو کھانا اور دیگر زمینی امداد فراہم کر رہی ہے۔ ایئر لائن کے ترجمان نے کہا کہ ہمیں مسافروں کو ہونے والی تکلیف پر افسوس ہے۔ ایئر انڈیا اپنے مسافروں اور عملے کی حفاظت کے لیے پوری طرح پرعزم ہے۔