’یوکرین پر حملہ کے بعد روس کو فوجی، معاشی اور سائبر محاذ پر زبردست نقصان‘

ایک طرف روس نے یوکرین میں تباہی مچائی ہوئی ہے، اور دوسری طرف یوکرین کے وزیر دفاع اولیکسی ریجنیکوف کا ایک بیان سامنے آیا ہے جس میں انھوں نے کہا ہے کہ 24 فروری کو یوکرین پر حملہ کرنے کے بعد روس کو فوجی، معاشی اور سائبر سبھی محاذ پر تباہناک نقصانات ہو رہے ہیں۔

ریجنیکوف کا کہنا ہے کہ ’’122 گھنٹے کی دفاع۔ ہمارے محافظوں کی بہادری نئے محاذ کھول رہی ہے جہاں دشمن نقصان برداشت کر رہے ہیں۔ معاشی محاذ پر، روس کو پہلے ہی تباہناک نقصان ہوا ہے۔ روسی کرنسی اب صرف کاغذ ہے۔ روسی تیل برآمدگی پر پہلی پابندی کا اعلان کیا گیا ہے۔‘‘

یوکرین کے وزیر نے یہ بھی یاد دلایا کہ یوروپ کے اسلحوں کی فراہمی بڑھ رہی ہے۔ دیگر سبھی ضرورتیں بھی یوروپ کی مدد سے پوری کی جا رہی ہیں۔ روس میں سینکڑوں، ہزاروں لوگ پہلے ہی جان چکے ہیں کہ ان کی حکومت ان سے جھوٹ بول رہی ہے کہ کوئی ’خصوصی مہم‘ نہیں ہے، اور اس کی جگہ ایک جارحانہ جنگ ہے جو پہلے ہی ہزاروں روسیوں کو مار چکا ہے۔