نمونیا سے ہار گئے فلم ’ہیری پوٹر‘ کے ’پروفیسر ڈمبلڈور‘، 82 سال کی عمر میں انتقال

مشہور ہالی ووڈ فلم ’ہیری پوٹر‘ میں پروفیسر ایلبس ڈمبلڈور کا کردار نبھانے والے اداکار سر مائیکل گیمبون کا انتقال ہو گیا ہے۔ انھوں نے 82 سال کی عمر میں اسپتال کے بستر پر آخری سانس لی۔ یہ خبر سر مائیکل گیمبون کی بیوی اور بیٹے نے دی ہے۔ ’پروفیسر ڈمبلڈور‘ کی موت سے متعلق خبر نے دنیا بھر میں موجود ان کے چاہنے والوں کو زبردست صدمہ پہنچایا ہے۔

میڈیا رپورٹس کے مطابق سر مائیکل گیمبون کے انتقال کی جانکاری ان کی بیوی لیڈی گیمبون اور بیٹے فرگس نے دی ہے۔ یہ خبر دیتے ہوئے انھوں نے کہا کہ ’’ہمیں سر مائیکل گیمبون کے انتقال کی خبر دیتے ہوئے بہت زیادہ تکلیف ہو رہی ہے۔ وہ ایک پیارے شوہر اور والد تھے۔‘‘ لیڈی گیمبون نے یہ بھی جانکاری دی کہ سر مائیکل گیمبون کی موت نمونیا کی وجہ سے ہوئی ہے۔ اس بیماری کے سبب انھیں اسپتال میں داخل کروایا گیا تھا۔ ڈاکٹروں کی لاکھ کوششوں کے بعد بھی وہ بچ نہیں سکے۔

واضح رہے کہ سر مائیکل گیمبون نے نہ صرف فلموں میں بلکہ تھیٹرس میں بھی اپنی عمدہ اداکاری سے لوگوں کو محظوظ کیا۔ انھوں نے پنٹر، بیکیٹ اور ایکبورن کے ڈراموں میں بہترین کام انجام دیا ہے۔ حالانکہ بیشتر فلم شائقین انھیں فلم ’ہیری پوٹر‘ کے کردار پروفیسر ڈمبلڈور کے لیے ہی یاد کرتے ہیں۔