ہندوستان کے دورے پر نہیں آئے گی پاکستان کی جونیئر ہاکی ٹیم، عالمی کپ سے نام لیا واپس

ہندوستان اور پاکستان کے درمیان تعلقات میں جاری کشیدگی کا اثر لگاتار کھیلوں پر پڑ رہا ہے۔ کرکٹ کے میدان میں ہاتھ نہ ملانے سے لے کر محسن نقوی کے ذریعہ ہندوستانی ٹیم کو ایشیا کپ کی ٹرافی نہ دینے جیسے تنازعات کے بعد اب خراب رشتوں کا کا اثر ہاکی میں بھی دکھائی دے رہا ہے۔ ہندوستان میں رواں سال ہونے والے ایف آئی ایچ جونئر ہاکی ورلڈ کپ 2025 سے پاکستان نے اپنا نام واپس لے لیا ہے۔ نومبر-دسمبر 2025 میں ہونے والے اس ٹورنامنٹ کے لیے پاکستانی ٹیم اب ہندوستان کے دورے پر نہیں آئے گی۔ یہ ٹورنامنٹ 28 نومبر سے 10 دسمبر تک تمل ناڈو کے چنئی و مدورئی میں کھیلا جائے گا۔

خبر رساں ایجنسی پی ٹی آئی کے مطابق انٹرنیشنل ہاکی فیڈریشن (ایف آئی ایچ) نے جمعہ (24 اکتوبر) کے روز ایک بیان جاری کر کے پاکستان کے ٹورنامنٹ سے باہر ہونے کا اعلان کیا۔ ایف آئی ایچ کی پریس ریلیز کے مطابق پاکستان ہاکی فیڈریشن (پی ایچ ایف) نے انہیں مطلع کیا ہے کہ وہ اس ٹورنامنٹ میں حصہ نہیں لیں گے اور کوالیفائی کرنے کے باوجود مقابلے سے نام واپس لے رہے ہیں۔

واضح رہے کہ 24 ٹیموں پر مشتمل اس جونئر عالمی کپ ہاکی میں پاکستان کو گروپ بی میں ہندوستان کے ساتھ رکھا گیا تھا، جہاں ان دونوں کے علاوہ چلی اور سوئٹزرلینڈ بھی شامل تھے۔ تاہم اب پاکستان کے انخلا کے بعد صورتحال بدل گئی ہے۔ ایف آئی ایچ نے بتایا ہے کہ پاکستان کی جگہ دوسری ٹیم کا اعلان جلد ہی کیا جائے گا۔

دوسری جانب ’ہاکی انڈیا‘ نے اس معاملے پر فی الحال کسی بھی قسم کی اطلاع سے انکار کیا ہے۔ پی ٹی آئی کی رپورٹ کے مطابق ہاکی انڈیا کے جنرل سکریٹری بھولاناتھ سنگھ نے بتایا کہ انہیں ابھی تک ایف آئی ایچ کی جانب سے پاکستان کے دستبردار ہونے کی کوئی باضابطہ اطلاع نہیں ملی ہے۔ بھولاناتھ سنگھ نے یہ بھی بتایا کہ ڈیڑھ ماہ قبل ان کی پاکستانی فیڈریشن کے عہدیداروں سے بات ہوئی تھی اور انہوں نے ٹورنامنٹ میں شرکت کی یقین دہانی کرائی تھی۔ انھوں نے واضح کیا کہ ان کی ذمہ داری ٹورنامنٹ کا کامیاب انعقاد اور ہندوستانی ٹیم کو چیمپئن بنانا ہے، اور وہ اسی پر توجہ دے رہے ہیں۔

اس درمیان پاکستان ہاکی فیڈریشن کے عہدیداروں نے کہا کہ وہ ٹورنامنٹ میں حصہ لینا چاہتے تھے، لیکن ہندوستان جانے کے لیے تیار نہیں تھے کیونکہ دونوں ملکوں کے درمیان کشیدگی برقرار ہے۔ رپورٹ میں پی ایچ ایف کے ایک افسر کے بیان کا حوالہ دیا گیا ہے، جس نے کہا گیا ہے کہ وہ کرکٹ کی طرح اس ٹورنامنٹ کے میچز بھی نیوٹرل وینیو (غیر جانبدار مقام) پر کھیلنے کے لیے تیار تھے، لیکن ایف آئی ایچ نے اس تجویز کو مسترد کر دیا۔

یہ پہلا موقع نہیں ہے جب پاکستان نے کسی ہاکی ٹورنامنٹ سے نام واپس لیا ہو۔ ہندوستان اور پاکستان کے درمیان مئی میں ہونے والے سرحدی تصادم کے بعد اگست-ستمبر میں مردوں کے ہاکی ایشیا کپ کا انعقاد ہندوستان میں ہی ہوا تھا۔ اس وقت بھی دونوں ملکوں کے درمیان کشیدگی کے باعث پاکستان نے ٹورنامنٹ سے دستبرداری اختیار کر لی تھی۔ اُس وقت پاکستان نے کہا تھا کہ وہ جونیئر عالمی کپ ہاکی کے لیے ٹیم بھیجے گا، لیکن اب پاکستانی فیڈریشن نے اس ٹورنامنٹ سے بھی اپنا نام واپس لے لیا ہے۔