فیفا عالمی کپ: دلچسپ مقابلے میں سوئٹزرلینڈ نے کیمرون کو ایک گول سے شکست دی

سوئٹزرلینڈ  نے بریل امبولو کے شاندار گول سے فیفا عالمی کپ کے پہلے مقابلے میں کیمرون کی ٹیم کو شکست دے دی۔  قطر کے الجنوب اسٹیڈیم میں کھیلے گئے میچ میں امبولو نے ایک شاندار کراس پر گول کیا۔ امبولو نے یہ گول میچ کے 48ویں منٹ میں کیا۔

سوئٹزرلینڈ کے لئے شکیری نے اس میچ میں شاندار کھیل کا مظاہرہ کیا اور مڈفیلڈر کے طور پر کھیلتے ہوئے اس نے اپنی ٹیم کے لئے گول کرنے کے کئی موقع پیدا کئے، لیکن انھیں گول میں تبدیل نہیں کیا جا سکا۔ قابل ذکر ہے کہ شکیری کا شمار یوروپ کے بہترین کھلاڑیوں میں ہوتا ہے اور ان کا جادو آج کے میچ میں بھی سر چڑھ کر بولا۔

دونوں ٹیموں کا کھیل تقریبا ایک جیسا تھا اور کچھ مواقع کو چھوڑ کر دونوں کے اسٹرائیکر نے گول کیپر کا زیادہ امتحان نہیں لیا۔ سوئٹزرلینڈ کو انجری ٹائم میں ایک شاندار اور آسان سا موقع بھی ملا لیکن کیمرون کے دفاعی کھلاڑی نے شاندار دفاع کر کے سوئٹزر لینڈ کو دوسرے گول سے محروم کر دیا۔

دونوں ہی ٹیموں کے ایک جیسے کھیل کا اندازہ اس بات سے لگایا جا سکتا ہے کہ دونوں ٹیموں نے گیند پر قبضہ تقریبا برابر رکھا۔ کیمرون کے پاس 49 فیصد گیند رہی جبکہ سوئٹزرلینڈ کے پاس 51 فیصد گیند رہی۔ دونوں ٹیموں نے  گول پر شاٹ بھی تقریباً برابر لئے اور کیمرون نے سات کے مقابلہ میں آٹھ شاٹ گول پر لئے۔ واضح رہے کہ کوچ نے امبولو کو 71 منٹ میں باہر بلا لیا۔

واضح رہے کہ امبولو کا تعلق کیمرون سے ہے اور ان کے والد اب بھی کیمرون میں رہتے ہیں۔ ان کی والدہ  اپنے پہلے شوہر سے طلاق لے کر فرانس آ گئی تھیں جہاں سے وہ سوئٹزرلینڈ منتقل ہو گئیں اور سوئٹزرلینڈ میں شادی کر لی۔ امبولو کی پرورش سوئٹزرلینڈ میں اپنی والدہ کے پاس ہی ہوئی اور اب وہ سوئٹزرلینڈ کی قومی ٹیم کے لئے کھیلتے ہیں۔