میچ کے دوران فٹ بال کھلاڑی پر گری بجلی، میدان پر ہی موت، 5 دیگر زخمی

پیرو میں ایک فٹ بال میچ کے دوران کھلاڑی کی آسمانی آفت کی وجہ سے موت کا معاملہ سامنے آیا ہے۔ پیرو میں یوینٹوڈ بیلاوستا اور فیمیلیا کوکا کے درمیان فٹ بال میچ کھیلا جا رہا تھا۔ اسی دوران شدید بارش ہونے لگی۔ فٹ بال کا کھیل بارش کے دوران بھی جاری رہتا ہے اور وہاں بھی ایسا ہی ہو رہا تھا۔ بارش کچھ زیادہ ہی تیز ہو گئی اور ریفری نے کھیل روکنے کا فیصلہ کیا۔ اسی دوران آسمان سے بجلی گری اور اس کی زد میں کئی کھلاڑی آ گئے۔ اس حادثہ میں ایک کھلاڑی کی جان چلی گئی اور کم از کم 5 شدید زخمی ہوئے۔

میڈیا رپورٹس کے مطابق مقابلے کے دوران تیز بارش کو دیکھتے ہوئے ریفری نے کھلاڑیوں کو کھیل روک کر میدان سے باہر جانے کو کہا۔ کھلاڑی میدان سے باہر جا ہی رہے تھے تبھی آسمان سے بجلی گری اور اس کی زد میں 39 سالہ کھلاڑی جاس ہیوگو ڈی لا کروز میسا آ گئے۔ میسا کے سر پر بجلی گری اور وہ میدان پر ہی فوت ہو گئے۔ میسا کے ساتھی کھلاڑی بھی بجلی کی زد میں آئے اور کچھ تو بری طرح جھلس گئے۔ ان کھلاڑیوں کو فوراً اسپتال لے جایا گیا۔ ان میں ایک کھلاڑی کی زندگی خطرے میں بھی بتائی جا رہی ہے۔

کچھ رپورٹس میں بتایا گیا ہے کہ گول کیپر ہوان چوکا بری طرح جھلس گئے ہیں اور وہ آئی سی یو میں داخل کیے گئے ہیں۔ حادثہ کے بعد اس میچ کو رد کرنے کا اعلان کر دیا گیا۔ سوشل میڈیا پر اس حادثہ کی ویڈیو بھی سامنے آئی ہے جس میں دیکھا جا سکتا ہے کہ کھلاڑی دھیرے دھیرے میدان سے باہر نکل رہے تھے کہ اچانک تیز بجلی گر اور کئی کھلاڑی میدان پر ہی گر پڑے۔ بعد میں کچھ کھلاڑیوں کو اٹھتے ہوئے بھی ویڈیو میں دیکھا جا سکتا ہے۔