مشہور بنگالی اداکارہ پایل چکربرتی کی مشتبہ حالت میں موت

بنگلہ فلم انڈسٹری کی ہونہار اداکارہ پایل چکربرتی کی موت کی خبر سے پوری فلم انڈسٹری حیران ہے۔ پایل کی لاش بدھ کی صبح مشتبہ حالت میں سلی گری ہوٹل میں ملی جو کہ شمالی بنگال میں ہے۔ پولس محکمہ نے موت کی تحقیقات شروع کر دی ہے اور شروعاتی رپورٹس کے مطابق امکان ظاہر کیا جا رہا ہے کہ پایل چکربرتی نے خودکشی کی ہے۔

ذرائع کے مطابق بنیادی طور پر جنوبی کولکاتا سے تعلق رکھنے والی پایل چکربرتی منگل کی صبح سلی گری چرچ روڈ واقع ایک ہوٹل میں ٹھہری تھیں۔ ہوٹل کے ذرائع کا کہنا ہے کہ وہ بدھ کی صبح غالباً گنگٹوک کے لیے روانہ ہونے والی تھیں۔ لیکن بدھ کے روز انھیں ہوٹل سے کسی بھی وقت نکلتے ہوئے نہیں دیکھا گیا اور دروازہ ان کی آمد کے بعد سے ہی اندر سے بند تھا۔ ہوٹل کے عملہ نے جب کئی بار دروازہ کھٹکھٹایا اور اندر سے کوئی رد عمل نہیں ملا تو انھوں نے پولس کو مطلع کیا۔ فوراً پولس ہوٹل پہنچی اور جب کمرے میں داخل ہوئی تو دیکھا کہ پایل کی لاش پڑی ہوئی ہے۔ لاش کو پولس نے فوری طور پر پوسٹ مارٹم کے لیے بھیج دیا۔

واضح رہے کہ پایل چکربرتی ایک نئی بنگالی فلم ’کیلو‘ میں انتہائی اہم کردار ادا کرنے والی تھی۔ پایل بنگالی فلموں کے علاوہ کئی ٹی وی سیریل میں بھی کام کر چکی ہیں۔ پولس ذرائع کا کہنا ہے کہ کچھ دن قبل ہی ان کا اپنے شوہر سے طلاق ہوا ہے اور اس موت کی ہر زاویے سے تحقیقات ہو رہی ہے۔ پولس پایل کے گھر والوں سے بھی رابطے میں ہے۔