عالمی کپ 2023: ہاردک پانڈیا کے ٹخنے میں سوجن، اگلے تین میچ کھیلنا مشکل

کرکٹ عالمی کپ میں ہندوستان کی کارکردگی اب تک زبردست رہی ہے۔ اس نے اب تک کھیلے گئے اپنے سبھی 5 میچوں میں جیت حاصل کی ہے اور ٹورنامنٹ کی واحد ایسی ٹیم ہے جسے ایک بھی شکست نہیں ملی۔ پھر بھی ہندوستانی ڈریسنگ روم میں سب کچھ اچھا نہیں چل رہا۔ ٹیم کے لیے اور ہندوستانی کرکٹ شیدائیوں کے لیے اس وقت سب سے بڑی فکر ہاردک پانڈیا کو لے کر ہے زخمی ہونے کی وجہ سے نیوزی لینڈ کے خلاف میچ نہیں کھیل سکے تھے۔ اب خبریں سامنے آ رہی ہیں کہ آئندہ 3 میچوں میں بھی ان کا کھیلنا ممکن نہیں۔

ہندوستان اپنا اگلا مقابلہ 29 اکتوبر کو انگلینڈ کے خلاف کھیلے گا اور امید ظاہر کی جا رہی تھی کہ ہاردک اس میچ میں پلیئنگ 11 کا حصہ رہیں گے۔ لیکن اب تک ہاردک پانڈیا صحت مند نہیں ہو پائے ہیں۔ ہاردک 19 اکتوبر کو پونے میں بنگلہ دیش کے خلاف کھیلتے ہوئے گیندبازی کے دوران فالو اَپ کے دوران پھسل گئے تھے اور پھر دوبارہ گیندبازی نہیں کر سکے۔ ہاردک کو ٹخنا مڑ گیا تھا جس کے علاج کے لیے وہ گزشتہ پیر کے روز بنگلورو میں این سی اے (نیشنل کرکٹ اکیڈمی) کو رپورٹ کیا تھا۔ اب ان کے انگلینڈ، سری لنکا اور جنوبی افریقہ کے خلاف میچ سے بھی دور رہنے کا امکان ہے۔

میڈیا رپورٹس کے مطابق ہاردک کے ٹخنے میں گریڈ 1 لگمنٹ ٹیئر ہے۔ سوجن کافی بڑھا ہوا ہے اور اس کی وجہ سے انھیں درد بھی ہے۔ حالانکہ اچھی بات یہ ہے کہ ہاردک کو فریکچر نہیں ہوا ہے۔ حالانکہ این سی اے کے ایک عہدیدار کا کہنا ہے کہ پانڈیا کی چوٹ سنگین ہو سکتی ہے۔ این سی اے میں نتن پٹیل کی قیادت میں میڈیکل ٹیم ان کی نگرانی کر رہی ہے اور ہاردک کی صحت یابی میں دو ہفتے لگ سکتے ہیں۔ پوری طرح فٹ ہونے کے بعد ہی این سی اے انھیں ریلیز کرے گا۔

ہندوستانی ٹیم مینجمنٹ کو این سی اے کی میڈیکل ٹیم نے مطلع کیا ہے کہ وہ ہاردک کو جلد ہی میدان پر واپس لانے کے لیے پُرامید ہیں۔ ٹیم فی الحال ہاردک کی جگہ کسی دیگر کھلاڑی کو اسکواڈ میں شامل کرنے کے بارے میں نہیں سوچ رہی۔ کپتان روہت شرما اور کوچ راہل دراوڑ ہاردک کی صحت یابی کا انتظار کر رہے ہیں۔