خواتین عالمی کپ فائنل: جنوبی افریقہ کا ٹاس جیت کر پہلے گیندبازی کا فیصلہ، ہندوستان کی شاندار شروعات

نوی ممبئی کی ڈی وائی پاٹل اسپورٹس اکیڈمی میں اتوار کے روز جاری آئی سی سی ویمنز ون ڈے ورلڈ کپ فائنل میں جنوبی افریقہ نے ٹاس جیت کر پہلے گیندبازی کا فیصلہ کیا لیکن ہندوستانی بلے بازوں نے شاندار آغاز کرتے ہوئے میچ کا رخ ابتدا ہی سے اپنی سمت موڑ دیا۔

بارش کے باعث میچ تقریباً دو گھنٹے تاخیر سے شروع ہوا، تاہم اوورز میں کوئی کمی نہیں کی گئی۔ ٹاس کے بعد جنوبی افریقہ کی کپتان لورا وولوارٹ نے کہا کہ پچ تعاقب کے لیے بہتر دکھائی دے رہی ہے اور گیند بازوں کو ابتدا میں کچھ مدد ملنے کی امید ہے لیکن ہندوستانی اوپنرز نے اس منصوبے کو ناکام بنا دیا۔

آخری اطلاع موصول ہونے تک ہندوستان نے 10 اوور میں بغیر کوئی وکٹ کھوئے 64 رن بنا لیے تھے۔ اسمرتی مندھانا 35 گیندوں پر 27 رن بنا کر جبکہ شیفالی ورما 25 گیندوں پر 29 رن کے ساتھ کریز پر موجود تھیں۔ دونوں بلے بازوں نے برق رفتاری سے آغاز کرتے ہوئے جنوبی افریقہ کی نئی گیند بازوں پر دباؤ بنا دیا۔

ہندوستانی کپتان ہرمن پریت کور نے ٹاس کے بعد کہا تھا کہ اگر وہ ٹاس جیتتیں تو پہلے گیندبازی ہی کرتیں، کیونکہ موسم اور اوور ہیڈ کنڈیشنز گیند بازوں کے لیے سازگار ہیں۔ تاہم انہوں نے یہ بھی کہا کہ بیٹنگ پہلے کرنا بھی موقع فراہم کرتا ہے کہ ٹیم کھل کر کھیلے اور بڑا اسکور بنائے۔ ان کے اندازے کے مطابق وکٹ پر ابتدا میں تھوڑی نمی ہے، مگر جیسے جیسے کھیل آگے بڑھتا ہے بلے بازی میں آسانی آ جائے گی۔

پچ پر ہلکی نمی کے باوجود ہندوستانی اوپنرز نے اعتماد کے ساتھ شارٹ کھیلتے ہوئے رن ریٹ کو مسلسل سات رن فی اوور سے اوپر رکھا۔ جنوبی افریقہ کی گیندبازی لائن اپ، جس سے تیز آغاز کی توقع تھی، ابتدائی اوورز میں لائن اور لینتھ برقرار رکھنے میں ناکام نظر آئی۔ میریزن کیپ اور ایابونگا کھاکا نے کوشش کی کہ نئی گیند سے سوئنگ نکال سکیں مگر ہندوستانی بلے بازوں نے ہر موقع پر حملہ آور انداز اختیار کیا۔

اس سے قبل ٹاس کے وقت جنوبی افریقہ کی کپتان لورا وولوارٹ نے کہا تھا کہ ’’یہ ایک بڑا دن ہے اور ہم موقع سے لطف اندوز ہونا چاہتے ہیں۔ پچ پر تھوڑی نمی ہے، امید ہے ہمارے نئے گیند باز ابتدا میں فائدہ اٹھائیں گے۔ تاہم ابتدائی 10 اوور کے بعد ہندوستان کی بلے بازی ان کے لیے چیلنج بن چکی تھی۔

ہندوستانی ٹیم کی پلیئنگ الیون میں شیفالی ورما، اسمرتی مندھانا، جمائمہ روڈریگز، ہرمن پریت کور (کپتان)، ریچا گھوش (وکٹ کیپر)، دیپتی شرما، امن جوت کور، رادھا یادو، کرانتی گوڑ، شری چرنی اور رینوکا سنگھ شامل ہیں۔

جنوبی افریقہ کی جانب سے لورا وولوارٹ (کپتان)، تزمین برٹس، انیکے بوش، سنے لوس، میریزن کیپ، اینری ڈرکسن، سنالو جافتا (وکٹ کیپر)، کلوی ٹراین، نادین ڈیکلرک، ایابونگا کھاکا اور نونکولولیکو ملابا میدان میں اتری ہیں۔

یہ فائنل دونوں ٹیموں کے لیے تاریخی موقع ہے کیونکہ دونوں ہی پہلی مرتبہ عالمی خطاب جیتنے کے قریب ہیں۔ ہندوستان نے دو بار (2005 اور 2017) فائنل تک رسائی حاصل کی تھی لیکن کامیابی نہیں ملی۔ گھریلو حالات اور شائقین کی بھرپور حمایت کے ساتھ ہندوستانی ٹیم نے شروعاتی اوورز میں اپنی برتری واضح کر دی ہے، جبکہ جنوبی افریقہ کو میچ میں واپسی کے لیے وکٹوں کی اشد ضرورت ہے۔