آئی پی ایل-2021 کی تکمیل کے امکانات روشن، دوبئی میں جلد شروع ہوگا ٹورنامنٹ!

کورونا کی وجہ سے ہندوستان میں ملتوی آئی پی ایل کا 14وں ایڈیشن 16 سے 20 ستمبر کے آس پاس پھر سے شروع اور 9 یا 10 اکتوبر کو ختم ہوسکتا ہے۔

تصویر آئی اے این ایس
تصویر آئی اے این ایس
user

یو این آئی

نئی دہلی: بایو ببل میں کورونا وائرس کی وجہ سے رد کیے گئے آئی پی ایل 2021 سیزن کے باقی میچوں کو ہندوستانی کرکٹ کنٹرول بورڈ (بی سی سی آئی) ستمبر-اکتوبر میں متحدہ عرب امارات (یو اے ای) میں کرانے کی تیاری کر رہا ہے۔ بورڈ آئندہ 29 مئی کو اپنی خصوصی جنرل میٹنگ (ایس جی ایم) کے بعد اس سلسلے میں باقاعدہ طور پر اعلان کرسکتا ہے۔

خبر یہ بھی ہے کہ کورونا کی وجہ سے ملتوی آئی پی ایل کا 14واں ایڈیشن 16 سے 20 ستمبر کے آس پاس پھر سے شروع اور 9 یا 10 اکتوبر کو ختم ہوسکتا ہے۔ حالانکہ انعقاد کا وقت آئندہ ٹی ٹوئنٹی عالمی کپ کے حساب سے ٹھیک نہیں بیٹھتا ہے جو 18 اکتوبر سے شروع ہو رہا ہے۔ دونوں ٹورنامنٹ وقت اور مقام کے لئے مقابلہ کر رہے ہیں حالانکہ بی سی سی آئی کے ایک ممبر نے یہ تصدیق کی ہے کہ ٹوئنٹی ٹوئنٹی عالمی کپ کے ممکنہ میزبان اسپانسر امارات کرکٹ بورڈ (ای سی بی) نے انہیں یقین دہانی کرتے ہوئے بقیہ آئی پی ایل کی شیڈیولنگ میں لچکدار بندوست پر رضامندی ظاہر کی ہے۔


توقع ہے کہ برانڈنگ اور دیگر سرگرمیوں کی تیاری کے لئے ٹی ٹوئنٹی عالمی کپ کی شروعات سے دس دن پہلے آئی سی سی کو فیلڈ سونپے جانے کی وجہ سے آئی پی ایل کی شیڈولنگ کی جائے گی۔ ایسے میں تین دستیاب جگہوں دبئی، شارجہ اور ابوظہبی میں میچوں کو وائرس سے پاک طریقہ سے منعقد کرنے کا منصوبہ ہے۔ اس صورتحال میں، بی سی سی آئی کو آخری کچھ مقابلے ایک ہی میدان پر کروانے پڑسکتے ہیں اور دیگر دو مقام آئی سی سی کو سونپے جاسکتے ہیں۔

رواں سال اکتوبر سے نومبر میں منعقدہ ٹی 20 ورلڈ کپ کی وجہ سے بی سی سی آئی کے پاس آئی پی ایل کے انعقاد کے لئے 20 سے 23 دن کی ونڈو موجود ہے اور ایسی صورتحال میں، بی سی سی آئی اس سیزن کو مکمل کرنے کے لئے کئی ڈبل ہیڈر میچوں کا اہتمام کرسکتا ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔