’گیند کے بعد پوری ٹیم غائب‘، فائنل میں ہندوستان کی جیت پر گجرات، دہلی اور یوپی پولیس نے ’ایکس‘ پر لیے مزے

ہندوستانی ٹیم نے اتوار (8 مارچ) کی رات تاریخ رقم کر دی ہے۔ ہندوستان اب 3 بار ٹی-20 ورلڈ کپ جیتنے والا دنیا کا اکلوتا ملک بن چکا ہے۔ لیکن اس تاریخی جیت کےساتھ ساتھ سوشل میڈیا پلیٹ فارم ’ایکس‘ پر دہلی پولیس، احمدآباد پولیس اور یوپی پولیس کے درمیان چھڑنے والی ’لفظی جنگ‘ نے محفل لوٹ لی۔ ان کے درمیان کا یہ ’ٹویٹر وار‘ کسی کمیڈی شو سے کم نہیں تھا، آپ بھی پڑھیں اور لطف اندوز ہوں۔

فائنل مقابلہ ہندوستان اور نیوزی لینڈ کے درمیان احمدآباد کے نریندر مودی اسٹیڈیم میں چل رہا تھا۔ ہندوستانی بلے باز کیوی گیند بازوں کی جم کر پٹائی کر رہے تھے۔ اسی درمیان دہلی پولیس نے اپنے ’ایکس‘ ہینڈل سے چٹکی لیتے ہوئے احمدآباد پولیس کو ٹیگ کر کہ لکھا کہ ’’ڈیئر، آپ کو نیوزی لینڈ کی جانب سے گیند گم ہونے کی شکایت مل سکتی ہے، کیونکہ ہمارے بلے باز انہیں اسٹینڈ میں بھیج رہے ہیں۔‘‘ احمدآباد پولیس بھی پیچھے نہیں رہی اور انہوں نے بھی پولیس والے انداز میں دہلی پولیس کو جواب دیا کہ ’’معاملے کو ہمارے علم میں لانے کے لیے شکریہ، سینئر افسران کو اس کی اطلاع دے دی گئی ہے۔‘‘

جیسے ہی ہندوستان نے نیوزی لینڈ کو 96 رنوں سے شکست دے کر ٹرافی اٹھائی، یوپی پولیس نے بھی اس معاملے کو لپکتے وہئے ایسا ٹویٹ کیا کہ انٹرنیٹ پر موجود صارفین ہنستے ہنستے لوٹ پوٹ ہو گئے۔ یوپی پولیس نے کیس ڈرائری انداز میں لکھا کہ ’’گزشتہ شکایت گیند گم ہونے کی تھی، نئی شکایت یہ ہے کہ پوری ٹیم ہی غائب ہو گئی۔ ہمارا اندازہ ہے کہ لا اینڈ آرڈر کا معاملہ نہیں ہے، یہ جسپریت بمراہ ہے۔‘‘

واضح رہے کہ نیوزی لینڈ پر اس تاریخی جیت کے ساتھ ہندوستان نے کئی بڑے ریکارڈ توڑ دیے ہیں۔ ہندوستان 3 بار ٹی-20 ورلڈ کپ جیتنے والا پہلا ملک بن گیا ہے۔ اس کے ساتھ ہی ہوم گراؤنڈ پر عالمی کپ جیتنے والا پہلا ملک بن گیا ہے اور مسلسل دوسری بار عالمی چمپئن بننے کا اعزاز بھی حاصل کر لیا ہے۔