ٹی-20 ورلڈ کپ 2026: جنوبی افریقہ کے خلاف ’سپر-8‘ کے پہلے مقابلے میں جیت کے ساتھ آغاز کرنا چاہے گی ہندوستانی ٹیم

ہندوستان اور جنوبی افریقہ کی ٹیمیں آج ٹی-20 ورلڈ کپ 2026 میں آمنے سامنے ہوں گی۔ یہ سپر-8 راؤنڈ میں گروپ 1 کا پہلا میچ ہے، جو احمدآباد کے نریندر مودی اسٹیڈیم میں کھیلا جائے گا۔ دونوں ٹیمیں لیگ اسٹیج میں اپنے اپنے گروپ میں ٹاپ پر رہی تھیں۔ سوریہ کمار یادو کی کپتانی میں ہندوستان مسلسل 4 میچ جیت کر آ رہی ہے، جبکہ دوسری جانب جنوبی افریقہ کی ٹیم بھی گروپ اسٹیج کے اپنے تمام مقابلے جیت کر یہاں پہنچی ہے۔

ٹی-20 ورلڈ کپ 2026 کے سپر-8 راؤنڈ میں ہندوستان اور جنوبی افریقہ کے علاوہ ویسٹ انڈیز اور زمبابوے بھی شامل ہیں۔ اس گروپ کی تمام ٹیمیں گروپ اسٹیج میں ایک بھی میچ نہیں ہاری ہیں، اسی وجہ سے اسے ’گروپ آف ڈیتھ‘ کہا جا رہا ہے۔ ہندوستان کے سپر-8 کا پہلا مقابلہ آج نریند مودی اسٹیڈیم میں شام 7 بجے شروع ہوگا۔ ہندوستانی ٹیم کو اس کے بعد 26 فروری کو زمبابوے کا سامنا کرنا ہے، جس نے گروپ مرحلے میں آسٹریلیا اور سری لنکا جیسی ٹیموں کو دی ہے۔ اس کے بعد یکم مارچ کو ویسٹ انڈیز سے مقابلہ ہوگا، جس نے گروپ مرحلے میں انگلینڈ جیسی مضبوط ٹیم کو 30 رنوں سے شکست دیا تھا۔

واضح رہے کہ سپر-8 کا پہلا مقابلہ جو پاکستان اور نیوزی لینڈ کے درمیان 21 فروری کو کھیلا جانا تھا وہ بارش کی نذر ہو گیا۔ حالانکہ احمدآباد میں آسمان صاف رہنے کا امکان ہے اور ہلکی ہوا چل سکتی ہے۔ دن کا زیادہ سے زیادہ درجہ حرارت 34 ڈگری سیلسیس تک جا سکتا ہے اور کم سے کم درجہ حرارت 19 ڈگری سیلسیس تک رہنے کا امکان ہے۔ اس مقابلے کے دوران موسم کافی گرم رہ سکتا ہے۔

قابل ذکر ہے کہ ہندوستان اور جنوبی افریقہ اب تک بین الاقوامی ٹی-20 کرکٹ میں 35 بار آمنے سامنے آئے ہیں، جن میں 21 بار ہندوستان نے کامیابی حاصل کی ہے اور جنوبی افریقہ صرف 13 بار جیت درج کر سکا ہے، جبکہ ایک میچ بے نتیجہ رہا تھا۔ 2024 کے آغاز سے لے کر اب تک دونوں ٹیمیں 9 بار آمنے سامنے آئی ہیں، جن میں سے جنوبی افریقہ صرف 2 بار ہی جیت پایا ہے۔