کانپور میں پہلے ٹسٹ میچ کے لئے سیکورٹی کے سخت انتظامات

کانپور: ہندوستان اور نیوزی لینڈ کے درمیان 25 نومبر سے شروع ہونے والے پہلے ٹسٹ میچ کے لیے کانپور کے گرین پارک اسٹیڈیم میں سیکورٹی کے وسیع انتظامات کیے گئے ہیں۔ کمشنریٹ پولیس نے گراؤنڈ سے لے کر کھلاڑیوں کے قیام کی جگہ تک سخت حفاظتی حصار بنانے کا فیصلہ کیا ہے اور 11 سرکلر سیکورٹی کورڈن تیار کیے گئے ہیں۔ سیکورٹی کے لیے ڈی سی پی سطح کے دو افسران کو یہ ذمہ داری سونپی گئی ہے تاکہ کسی کوتاہی کا امکان نہ رہے۔

گراؤنڈ کے اندر سے لے کر باہر اور ہوٹل تک، پورے واقعہ پر انٹیلی جنس کی نگاہیں رہیں گی ۔ بی سی سی آئی کی جانب سے یو پی سی اے کے وینیو ڈائریکٹر سنجے کپور اور میجر ایس بی سنگھ کو سیکورٹی انچارج کے طور پر مقرر کیا گیا ہے۔ ٹیم انڈیا کے 10 کھلاڑی یہاں پہنچ چکے ہیں جبکہ باقی کھلاڑی اور نیوزی لینڈ ٹیم کے تمام کھلاڑی 22 نومبر کو شہر آئیں گے۔

کانپور میں پریکٹس کے لیے 23 نومبر اور 24 نومبر کے دن مقرر کیے گئے ہیں جس میں دونوں ٹیموں کے پریکٹس کا وقت صبح 10 بجے سے ایک بجے تک اور دوپہر 2 بجے سے شام 5 بجے تک دیا گیا ہے۔ شام میں دونوں ٹیمیں مختلف اوقات میں نیٹ پریکٹس کرسکتی ہیں۔ گرین پارک میدان کو 11 زونز میں تقسیم کیا گیا ہے، ہر زون کی سربراہی ایک ایڈیشنل ڈی سی پی یا اے سی پی سطح کے افسر کو دی گئی ہے۔

گرین پارک گراؤنڈ کو 11 زونز میں تقسیم کیا گیا ہے جس میں ایک اندرونی اور بیرونی کارڈن بنایا گیا ہے۔ اندرونی کارڈن کو 1 سے 5 میں اور گرین پارک کے بیرونی کارڈن کو تین زونز 6,7,8 میں تقسیم کیا گیا ہے۔ گرین پارک کے باہر ترتیب سے ٹریفک/پارکنگ وغیرہ کو ہموار چلانے کے لیے زون 9 اور 10 اور ہوٹل لینڈ مارک کو زون نمبر 11 بنایا گیا ہے جو کھلاڑیوں کے قیام کی جگہ ہے۔

میچ کے لیے ڈی سی پی رینک کے دو، اے ڈی سی پی سطح کے 10، اے سی پی سطح کے 16 افسران تعینات کیے گئے ہیں۔ اس کے علاوہ 68 انسپکٹرز، 324 ایس آئیز، 12 خواتین سب انسپکٹرز اور 1369 ہیڈ کانسٹیبلز/ کانسٹیبلز کی ڈیوٹی لگائی جائے گی۔