اسٹیون اسمتھ کے ٹیسٹ کرکٹ میں 11 ہزار رن مکمل، یہ کارنامہ انجام دینے والے دنیا کے 12ویں بلے باز
اسٹیون اسمتھ نے اپنے ٹیسٹ کیریئر کی 226ویں اننگ میں 11 ہزار رن کا ہندسہ عبور کیا۔ وہ اس سنگ میل تک سب سے کم اننگ میں پہنچنے والے بلے بازوں کی فہرست میں پانچویں مقام پر ہیں۔
آسٹریلیا کے اسٹار بلے باز اسٹیون اسمتھ نے ٹیسٹ کرکٹ میں ایک اور بڑی کامیابی حاصل کر لی ہے۔ جنوبی افریقہ کے خلاف گکیبرہا میں کھیلے جا رہے دوسرے ٹیسٹ میچ کے دوران اسمتھ نے ٹیسٹ کرکٹ میں 11 ہزار رن مکمل کر لیے۔ وہ اس مقام تک پہنچنے والے آسٹریلیا کے تیسرے اور دنیا کے 12ویں بلے باز بن گئے ہیں۔ حالانکہ اسمتھ کے اس انفرادی ریکارڈ کے درمیان آسٹریلیا کی ٹیم پہلی اننگ میں محض 99 رن پر آل آؤٹ ہو گئی۔ اس کے بعد جنوبی افریقہ نے آسٹریلیا کو فالو آن دے دیا۔
37 سالہ اسٹیون اسمتھ نے سینٹ جارج پارک میں آسٹریلیا کی پہلی اننگ کے دوران 88 گیندوں پر 28 رنز رن بنائے۔ ان کی اننگ میں 2 چوکے شامل تھے۔ ویان ملڈر نے انہیں بولڈ کر کے پویلین بھیج دیا۔ اسمتھ نے اپنے ٹیسٹ کیریئر کی 226ویں اننگ میں 11 ہزار رن کا ہندسہ عبور کیا۔ وہ اس سنگ میل تک سب سے کم اننگ میں پہنچنے والے بلے بازوں کی فہرست میں پانچویں مقام پر ہیں۔
11 ہزار ٹیسٹ رنز بنانے والے آسٹریلوی بلے بازوں میں اسمتھ سے قبل رکی پونٹنگ اور ایلن بارڈر یہ کامیابی حاصل کر چکے ہیں۔ پونٹنگ نے اپنے ٹیسٹ کیریئر میں 13378 رنز بنائے، جبکہ بارڈر کے نام 11174 رن درج ہیں۔ سب سے کم اننگز میں 11 ہزار ٹیسٹ رن مکمل کرنے کا ریکارڈ سری لنکا کے کمار سنگاکارا کے نام ہے۔ انہوں نے 208 اننگز میں یہ ہندسہ عبور کیا تھا۔ ویسٹ انڈیز کے برائن لارا 213 اننگز کے ساتھ دوسرے مقام پر ہیں۔ پونٹنگ نے 222، جبکہ ہندوستان کے مایہ ناز بلے باز سچن تندولکر نے 223 اننگز میں یہ کامیابی حاصل کی تھی۔ اسمتھ نے 226 اننگز میں 11 ہزار رن مکمل کر کے راہل دراوڑ اور جنوبی افریقہ کے جیک کیلس کو پیچھے چھوڑ دیا۔ ان دونوں عظیم بلے بازوں نے اس ہندسے تک پہنچنے کے لیے 234-234 اننگز کھیلی تھیں۔
قابل ذکر ہے کہ اسٹیون اسمتھ کے لیے یہ دن انفرادی کامیابی کے لحاظ سے خاص رہا، لیکن آسٹریلوی ٹیم کو ٹیسٹ میچ میں مشکل حالات کا سامنا کرنا پڑا۔ جنوبی افریقہ کے گیند بازوں نے آسٹریلیا کی پہلی اننگ محض 99 رنز پر سمیٹ دی۔ مارکو یانسن نے شاندار گیند بازی کرتے ہوئے 5 وکٹیں حاصل کیں۔ ویان ملڈر کو 2 وکٹیں ملیں، اسی نے اسمتھ کو آؤٹ کیا۔ اس سے قبل جنوبی افریقہ نے اپنی پہلی اننگ میں کپتان ٹیمبا باؤما کے شاندار 179 رنز کی بدولت مضبوط اسکور کھڑا کیا تھا۔ شروعاتی جھٹکوں سے سنبھلنے میں یانسن کے 85 رنز کا بھی اہم کردار رہا۔ پہلی اننگ میں بڑی برتری حاصل کرنے کے بعد جنوبی افریقہ نے آسٹریلیا کو فالو آن دینے پر مجبور کر دیا۔
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔