پرتھوی شا مشکل میں، مبینہ چھیڑ چھاڑ معاملے میں جواب داخل نہیں کرنے پر عدالت نے لگایا جرمانہ

ہندوستانی کرکٹر پرتھوی شا ایک بار پھر مشکلوں میں ہیں۔ ممبئی کی ایک عدالت نے مبینہ چھیڑ چھاڑ اور مارپیٹ معاملے میں سوشل میڈیا انفلوینسر سپنا گل کی عرضی کا جواب دینے میں ناکام رہنے کو لے ان پر 100 روپے کا جرمانہ عائد کیا ہے۔ گل نے اپریل 2024 میں ڈنڈوشی سیشن عدالت میں ایک فوجداری جائزہ عرضی دائر کی تھی جس میں ایک مجسٹریٹ کے حکم کو چیلنج کیا گیا تھا۔

مجسٹریٹ نے اپنے حکم میں پولیس کو 2022 میں اندھیری کے ایک پب میں مبینہ طور سے چھیڑ چھاڑ کرنے کے لیے شا کے خلاف اطلاع اول درج کرنے کا حکم دینے سے انکار کر دیا تھا۔ اس کے بعد معاملہ سیشن عدالت میں گیا۔ سیشن عدالت نے کئی تاریخوں پر پرتھوی شا سے عرضی پر جواب طلب کیا تھا۔

منگل کو عدالت نے کہا کہ گزشتہ تاریخ پر کرکٹر پرتھوی شا کو ایک آخری موقع دیا گیا تھا لیکن انہوں نے کوئی جواب داخل نہیں کیا۔ عدالت نے سماعت 16 دسمبر تک منسوخ کرتے ہوئے کہا، ’’پھر بھی 100 روپے کے جرمانے پر ایک اور موقع دیا جاتا ہے۔‘‘

گل کا موقف پیش کر رہے وکیل علی اشرف خان نے دعویٰ کیا کہ شا کو کئی مرتبہ طلب کیے جانے کے باوجود انہوں نے باقاعدہ طور پر یہ ترکیب اپنائی۔ سوشل میڈیا انفلوینسر نے سب سے پہلے اندھیری مجسٹریٹ عدالت میں شکایت درج کرائی تھی، جس میں پولیس کو شا کے خلاف اطلاع اول درج کرنے کا حکم دینے کی گزارش کی گئی تھی۔

مجسٹریٹ عدالت نے گزشتہ سال صرف پولیس جانچ کا حکم دیا تھا۔ اس کے بعد انہوں نے سیشن عدالت کا رخ کیا اور کہا کہ نچلی عدالت کا حکم پوری طرح سے غلط اور قانون کے اصولوں کے خلاف ہے اور اسے منسوخ کیا جانا چاہیے۔

واضح رہے کہ سپنا گل کو فروری 2023 میں ایک ہوٹل میں سیلفی لینے کو لے کر ہوئے تنازعہ کے بعد پرتھوی شا پر مبینہ حملے کے سلسلے میں کچھ دیگر لوگوں کے ساتھ گرفتار کیا گیا تھا۔ ضمانت ملنے کے بعد گل نے شا اور اس کے دوست آشیش یادو اور دیگر کے خلاف مبینہ چھیڑ چھاڑ کی شکایت کے ساتھ ایئر پورٹ پولیس تھانے کا رخ کیا تھا لیکن پولیس نے معاملہ درج نہیں کیا۔