ٹیم انڈیا کی 31 سال میں سب سے شرمناک شکست، نیوزی لینڈ 3-0 سے فتحیاب

نیوزی لینڈ نے اس کلین سویپ سے ہندوستان سے ٹی -20 سیریز میں ملی صفر۔پانچ کی کلین سویپ کا بدلہ بھی لیا اور ساتھ ہی ہندوستان کے خلاف تین یا اس سے زیادہ میچوں کی ون ڈے سیریز میں پہلی بار کلین سویپ کیا۔

تصویر سوشل میڈیا
تصویر سوشل میڈیا
user

یو این آئی

ماؤنٹ مونگانئی: لوکیش راہل (112) کی شاندار سنچری بھی ہندوستان کو تیسرے اور آخری ون ڈے میں شکست سے نہیں بچا سکی اور میزبان نیوزی لینڈ نے سلامی بلے باز ہینری نکولس (80)، مارٹن گپٹل (66) اور کولن ڈی گرینڈهوم (ناٹ آوٹ 58) کی نصف سنچریوں کی بدولت یہ مقابلہ پانچ وکٹ سے جیت کر تین میچوں کی سیریز 0۔3 سے کلین سویپ کر لی۔ یہ 31 سال میں پہلا موقع ہے جب باہمی ون ڈے سیریز میں ٹیم انڈیا کو کلین سوئپ کا سامنا کرنا پڑا ہے۔

نیوزی لینڈ نے اس کلین سویپ سے ہندوستان سے ٹی -20 سیریز میں ملی صفر۔پانچ کی کلین سویپ کا بدلہ بھی لیا اور ساتھ ہی ہندوستان کے خلاف تین یا اس سے زیادہ میچوں کی ون ڈے سیریز میں پہلی بار کلین سویپ کیا۔ ہندوستان نے گزشتہ نیوزی لینڈ کے دورے میں ون ڈے سیریز 1۔4 سے جیتی تھی لیکن اس بار اسے تینوں ہی میچوں میں زبردست شکست کا سامنا کرنا پڑا۔

ہندوستان نے پہلے بلے بازی کرتے ہوئے 50 اوور میں سات وکٹ پر 296 رن کا مضبوط اسکور بنایا لیکن فارم میں چل رہے نیوزی لینڈ کے بلے بازوں کے سامنے یہ اسکور بھی چھوٹا ثابت ہوا۔ میزبان ٹیم نے 47.1 اوور میں پانچ وکٹ پر 300 رن بنا کر یکطرفہ کامیابی حاصل کر لی۔

ٹی -20 اور ون ڈے سیریز ختم ہونے کے بعد دونوں ٹیمیں اب 21 فروری سے شروع ہونے والی دو ٹیسٹ میچوں کی سیریز میں اتریں گی۔ پہلا ٹیسٹ 21 فروری سے ویلنگٹن میں اور دوسرا ٹیسٹ 29 فروری سے کرائسٹ چرچ میں کھیلا جائے گا۔

بڑے ہدف کا تعاقب کرتے ہوئے گپٹل اور نکولس نے پہلے وکٹ کے لئے 16.3 اوور میں 106 رن جوڑ کر میزبان کو ٹھوس بنیاد دی۔ گپٹل نے 46 گیندوں پر 66 رنز کی دھماکہ خیز اننگز میں چھ چوکے اور چار چھکے لگائے۔ کپتان کین ولیم کندھے کی چوٹ کی وجہ سے پہلے دو میچوں میں باہر رہے تھے لیکن اس میچ میں لوٹ کر انہوں نے 31 گیندوں میں دو چوکوں کی مدد سے 22 رنز بنائے۔ چہل نے گپٹل کو بولڈ کر ہندستان کو پہلی کامیابی دلائی۔ چہل نے پھر ولیمسن کو مینک اگروال کو ہاتھوں کیچ کراکر دوسرا وکٹ لیا۔

ہندوستان کے لئے اب تک سر درد رہے راس ٹیلر کو جڈیجہ نے کپتان وراٹ کوہلی کے ہاتھوں کیچ کرا دیا۔ ٹیلر نے 18 گیندوں پر 12 رنز بنائے۔ٹھاکر نے نکولس کو وکٹ کے پیچھے راہل کے ہاتھوں کیچ کرایا۔ نکولس نے 103 گیندوں پر نو چوکوں کی مدد سے 80 رنز بنائے۔ نیوزی لینڈ کا چوتھا وکٹ 189 کے اسکور پر گرا۔ اس وقت ہندستان کو جیت کی امید نظر آنے لگی تھی۔ جیمز نیشام 25 گیندوں میں 19 رنز بنا کر چہل کا تیسرا شکار بنے اور ان کا وکٹ 40 ویں اوور میں 220 کے اسکور پر گرا۔ لیکن ٹام لاتھم اور گرینڈهوم نے چھٹے وکٹ کے لئے 80 رن کی ناٹ آؤٹ ساجھےداری کرکے 17 گیند باقی رہتے ہی میچ ختم کر دیا۔

گرینڈهوم نے 28 گیندوں پر چھ چوکے اور تین چھکے اڑاتے ہوئے ناقابل شکست 58 رنز بنائے جبکہ لاتھم نے 34 گیندوں پر تین چوکوں کے سہارے ناٹ آؤٹ 32 رنز بنائے۔ نکولس کو پلیئر آف دی میچ اور ٹیلر کو پلیئر آف دی سیریز کا ایوارڈ ملا۔اس مقابلے میں وکٹ کیپر بلے باز لوکیش راہل (112) کی شاندار سنچری آخر میں ضائع چلی گئی۔ گیند بازوں نے ان کی محنت پر پانی پھیر دیا۔ راہل نے 113 گیندوں میں نو چوکے اور دو چھکوں کی مدد سے 112 رنز بنائے۔ شريس ایئر نے 63 گیندوں میں 62 رن کی اننگز میں نو چوکے لگائے۔اوپنر پرتھوی شا نے 42 گیندوں پر 40 رنز میں تین چوکے اور دو چھکے لگائے جبکہ منیش پانڈے نے 48 گیندوں میں دو چوکوں کے سہارے 42 رن بنائے۔ کپتان وراٹ کوہلی نے پھر مایوس کیا اور 12 گیندوں میں نو رنز بنا کر آؤٹ ہو گئے۔ مینک اگروال ایک رن بنا کر آؤٹ ہوئے جبکہ جڈیجہ آٹھ رن پر ناٹ آؤٹ رہے۔ شاردل ٹھاکر نے سات اور نوديپ سینی نے ناٹ آؤٹ آٹھ رن بنائے۔

ٹاس ہار کر بلے بازی کرنے اتری ہندستانی ٹیم کی شروعات اچھی نہیں رہی اور اسے دوسرے اوور میں ہی مینک کےطور پر پہلا جھٹکا لگا۔ ميك کو کائل جیمی سن نے بولڈ کر پویلین بھیجا۔ وراٹ کو ہامش بینیٹ کی گیند پر جیمی سن نے کیچ کیا۔شروعاتی جھٹکے لگنے کے بعد اگرچہ اوپنر پرتھوی شا نے شريس کے ساتھ مل کر ہندوستانی اننگز کو آگے بڑھایا لیکن رن چرانے کے چکر میں پرتھوی رن آؤٹ ہو گئے۔ پرتھوی کے آؤٹ ہونے کے بعد راہل نے شريس کے ساتھ مل کر شراکت کو آگے بڑھایا اور دونوں نے چوتھے وکٹ کے لئے 100 رن کی ساجھےداری کی۔

شريس نے پہلے اپنی نصف سنچری مکمل کی لیکن اس کے کچھ دیر بعد ہی وہ جیمز نیشام کا شکار ہو گئے۔ شريس کے بعد میدان پر اترے منیش نے سدھی ہوئی اننگز کھیلتے ہوئے راہل کے ساتھ ہندستانی اننگز کو رفتار دی۔ دونوں بلے بازوں کے درمیان پانچویں وکٹ کے لئے 107 رنز کی مضبوط شراکت ہوئی۔ اگرچہ یہ شراکت اور بڑی ہوتی اس سے پہلے ہی راہل اور اس کے فورا بعد منیش اپنے اپنے وکٹ گنوا بیٹھے۔ نیوزی لینڈ کی جانب سے بینیٹ نے 10 اوور میں 64 رن دے کر چار وکٹیں حاصل کیں۔ جیمی سن نے 53 رنز اور نیشام نے 50 رن دے کر ایک ایک وکٹ لیا۔

Published: 11 Feb 2020, 5:34 PM