ممبئی: کرکٹ کے میدان میں پھر ہوئی موت، گیند لگنے سے 52 سالہ کھلاڑی کا انتقال

ایک بار پھر کرکٹ کے میدان میں گیند سے چوٹ لگنے پر کھلاڑی کی موت واقع ہو گئی ہے۔ واقعہ ممبئی کا ہے جہاں میچ کھیلنے کے دوران ایک 52 سالہ شخص کی موت ہو گئی۔ حالانکہ یہ کرکٹ میچ ذیلی سطح کا تھا جہاں جیش ساولا نامی کھلاڑی کان کے پیچھے چوٹ لگنے کی وجہ سے موت کی نیند سو گیا۔

میڈیا رپورٹس کے مطابق معاملہ پیر کی دوپہر کا ہے جب ایک ہی ٹورنامنٹ کے دو ٹی-20 میچ ایک ہی میدان پر چل رہے تھے۔ یہ ٹورنامنٹ 50 سال سے اوپر کے لوگوں کے لیے منعقد ہوا ہے۔ ٹورنامنٹ کا نام کٹچی ویسا اوکھل وکاس لیجنڈ کپ ہے۔ ایک عینی شاہد نے بتایا کہ جیش ساولا قریبی دادر پارسی کالونی اسپورٹنگ کلب میدان پر ایک بلے باز کے سامنے پیٹھ کر کے فیلڈنگ کر رہے تھے، تبھی ایک گیند ان کے کان کے پیچھے لگی۔ دراصل جو گیند ساولا کو لگی، وہ دوسرے میچ کی تھی۔

چوٹ لگنے کے بعد ساولا گر گئے اور انھیں فوراً اسپتال لے جایا گیا۔ حالانکہ انھیں بچایا نہیں جا سکا، ڈاکٹروں نے انھیں مردہ قرار دے دیا۔ ایک ہی میدان پر دو میچ ہونا چھوٹے سطح پر عام بات ہے۔ ان میچوں کے دوران کھلاڑیوں کے زخمی ہونے کی خبریں پہلے بھی آتی رہی ہیں۔ لاین تاراچند اسپتال کے میڈیکل افسر کا کہنا ہے کہ ساولا کو شام تقریباً 5 بجے مردہ حالت میں لایا گیا تھا۔

قابل ذکر ہے کہ کرکٹ کے میدان پر کھلاڑی کی موت کوئی پہلا واقعہ نہیں ہے۔ بڑے سطح پر کھیلے جا رہے میچ کے دوران بھی گیند سے چوٹ لگنے کے سبب کھلاڑی کی موت ہوئی ہیں۔ 2015 میں ریمنڈ وان اسکور، 2014 میں فلپ ہگس، 2013 میں ڈیرن رنڈل، 1998 میں رمن لامبا جیسے کھلاڑیوں کی موت کرکٹ کے میدان پر چوٹ لگنے کی وجہ سے ہی ہوئی تھی۔